نئی دہلی: بھیم آرمی چیف چندرشیکھر آزاد نے جمعرات کے روز اعلان کیا کہ وہ دلتوں کی امنگوں کو پورا کرنے کے لئے ایک نئی سیاسی جماعت کی تشکیل دیں گے۔
ان کا دعویٰ ہے کہ ان کی پارٹی “بہوجن سماج (دلت برادری) کو سیاست کے میدان میں ایک متبادل پیش کرے گی۔
انہوں نے ٹویٹ کیا کہ ”میں چندرشیکھر آزاد اعلان کر رہا ہوں میں بہوجن سماج کو ایک نیا سیاسی متبادل دے رہا ہوں۔ میں ان دیانتدار محنتی اور مشنری نوجوانوں سے اپیل کرتا ہوں جنہوں نے اپنی زندگی معاشرے کے لئے وقف کی ہے وہ پارٹی کی رہنمائی کریں اب جو کام کرتے ہیں وہ سیاستدان بنیں گے نہ کہ صرف وہی لوگ جن کے پاس پیسہ ہے۔
انہوں نے اپنے حامیوں سے اپیل کی کہ وہ اپنی نئی پارٹی کے لئے نام تجویز کریں۔
انہوں نے مزید کہا کہ ”آپ کی محبت اور اعتماد کی وجہ سے میں ہمیشہ آپ سب کا مقروض رہوں گا۔ یہ میرے لئے ایک جذباتی لمحہ ہے اور جب میں نے ایک نیا سیاسی آپشن دینے کا فیصلہ کیا ہے تو میں آپ سے درخواست کرتا ہوں کہ اس کے لئے کوئی نام تجویز کریں۔
لوک سبھا انتخابات کے دوران اترپردیش کی سابق وزیر اعلی اور بی ایس پی سربراہ مایاوتی نے آزاد کو بی جے پی کا ایجنٹ کہا تھا۔
مایاوتی نے ٹویٹ کیا تھا کہ ”بی جے پی نے بھیم آرمی چیف چندر شیکھر کو جاسوس کی حیثیت سے بی ایس پی میں شامل ہونے میں مدد کرنے کی پوری کوشش کی لیکن ہم نے اس سازش کو ناکام کیا۔ قومی مفاد میں یہ بہت ضروری ہے کہ خود مختار ، استبداد پسند ، دلت مخالف ، او بی سی اور اقلیتوں کے مخالفت کرنے والوں کو اقتدار سے الگ کر دیں۔ براہ کرم یقینی بنائیں کہ کوئی ووٹ ضائع نہ کریں۔