پٹنہ، 13 اگست (یواین آئی) بہار میں جاری ووٹر نظرثانی مہم (ایس آئی آر) کے تحت ڈرافٹ ووٹر لسٹ کی اشاعت کے پہلے 12 دنوں میں الیکشن کمیشن کو کل 17,665 دعوے اور اعتراضات موصول ہوئے ہیں۔الیکشن کمیشن کو موصول ہونے والے تمام 17,665 دعوے اور اعتراضات اہل ووٹرز کو فہرست میں شامل کرنے اور فہرست سے نااہل ناموں کو ہٹانے سے متعلق درخواستیں ہیں۔ ان سے متعلق کمیشن کو موصول ہونے والی درخواستوں میں سے 454 کو سات دنوں کے اندر نمٹا دیا گیا ہے ۔اس عرصے کے دوران 18 سال یا اس سے زیادہ عمر کے 74,525 نئے ووٹرز نے ووٹر لسٹ میں اپنا نام شامل کرنے کیلئے درخواستیں جمع کرائی ہیں۔اس کے ساتھ ساتھ سیاسی جماعتوں کی جانب سے بوتھ لیول ایجنٹس (بی ایل اے ) کو بھی تیزی سے نامزد کیا جا رہا ہے ۔ اس میں بھارتیہ جنتا پارٹی (بی جے پی) نے اب تک 53,338 بی ایل اے کو نامزد کرکے برتری حاصل کی ہے ۔ کانگریس 17,549 بی ایل اے کو نامزد کرکے دوسرے نمبر پر ہے ۔کمیونسٹ پارٹی آف انڈیا (مارکسسٹ) نے 899، بہوجن سماج پارٹی (بی ایس پی) نے صرف 74، نیشنل پیپلز پارٹی نے سات اور عام آدمی پارٹی (اے اے پی) نے صرف ایک بی ایل اے کو نامزد کیا ہے ۔علاقائی جماعتوں کی فہرست میں راشٹریہ جنتا دل (آر جے ڈی) 47,506 بی ایل اے کے ساتھ سب سے آگے ہے ۔ جبکہ حکمراں جنتا دل یونائیٹڈ (جے ڈی یو) نے کمیشن میں 36,550 بی ایل اے کو نامزد کیا ہے ۔ دیگر علاقائی جماعتوں میں راشٹریہ لوک جن شکتی پارٹی نے 1913، سی پی آئی (ایم ایل) نے 1496، لوک جن شکتی پارٹی (رام ولاس) نے 1210 اور راشٹریہ لوک سمتا پارٹی نے 270 بی ایل اے کو نامزد کیا ہے ۔
