نئی دہلی : بیمہ کمپنیوں میں غیر ملکی سرمایہ کاری کی حد بڑھانے والے بیمہ ترمیمی بل 2021 کے سلسلے میں راجیہ سبھا میں جمعرات کو کانگریس سمیت اپوزیشن پارٹیوں نے شدید ہنگامہ کیا ۔اپوزیشن لیڈر ملک ارجن کھرگے نے کہا کہ یہ اہم بل ہے ، لہٰذا اسے ایوان کی اسٹینڈنگ کمیٹی کو بھیجا جانا چاہیے ۔ اس سے پہلے کانگریس کے ہی رکن شکتی سنگھ گوہل نے کہا کہ اس بل کو ترمیمی ایجنڈے میں شامل کیا گیا ہے اور اراکین کو اسے پڑھنے کا موقع نہیں ملا ہے ۔ حالانکہ مسٹر ہری ونش نے اسے خارج کر دیا اور کہا کہ یہ بل دو تین دن پہلے ایوان میں پیش ہو چکا ہے ۔اس درمیان سیتا رمن نے بل کو بحث کے لیے پیش کر دیا۔ بل کو اسٹینڈنگ کمیٹی میں بھیجنے کے مطالبے کی حمایت میں کانگریس اور اپوزیشن کے دیگر اراکین چیئر کے سامنے آ گئے اور نعرے بازی کرنے لگے ۔ اس دوران ڈی ایم کے ’ کے رہنما تیروچی شیوا نے انتظام کا سوال اٹھا دیا۔ بی جے پی لیڈر بھوپیندر یادو نے کہا بیمہ بل کو اسٹینڈنگ کمیٹی میں بھیجنے کی ضرورت نہیں ہے اور اس کی کئی کمیٹیوں اور کمیشنوں کی جانب سے جانچ کے بعد سفارش کی ہے ۔ اس درمیان کانگریس اور اپوزیشن کے اراکین نعرے بازی کرتے رہے ۔
