بغداد؍ دمشق: امریکہ کی حمایت یافتہ سیریئن ڈیموکریٹک فورسز’ایس ڈی ایف‘ اور ترکیہ کے وفادار مسلح گروپس کے درمیان شمال مشرقی شام میں ایک ماہ سے تصادم جاری ہے۔دوسری طرف امریکہ کی قیادت میں بین الاقوامی اتحاد نے ’ایس ڈی ایف‘ کو مزید فوجی کمک بھیجی ہے۔میڈیا نے اطلاع دی ہیکہ سابق صدر بشار الاسد کی حکومت کے خاتمے کے بعد اتحادی افواج کا سب سے بڑا قافلہ عراق کے کردستان علاقے کے ساتھ الولید کراسنگ سے شام کی سرزمین میں داخل ہوا۔نامہ نگار نے مزید کہا کہ قافلے میں ہتھیار، گولہ بارود اور لاجسٹک آلات سے لدے 60 ٹرک شامل تھے، جو حسکہ اور دیر الزور گورنری میں اتحادی اڈوں کی طرف روانہ ہوئے۔انہوں نے واضح کیا کہ اسد کے سقوط کے بعد سے اب تک قافلوں کی تعداد 6 تک پہنچ چکی ہے جن میں تقریباً 210 ٹرک شامل ہیں۔اس کے علاوہ انہوں نے نشاندہی کی کہ یہ کمک دیر الزور، رقہ اور کوبانی (عین العرب) میں امریکی بکتر بند گاڑیوں اور فوجیوں کی ایک بڑی نقل و حرکت کے ساتھ بھیجی گئی ہے۔امریکی انتظامیہ جس کے نمائندوں نے گذشتہ ہفتے دمشق میں نئی انتظامیہ کے سربراہ احمد الشرع سے ملاقات کی تھی نے گذشتہ دنوں بار بار خبردار کیا تھا کہ داعش شام میں رونما ہونے والی تبدیلیوں سے فائدہ اٹھائے گی اور بشارالاسد کے اقتدار کیخاتمے کیلئے دہشت گردی کی کارروائیوں کو انجام دینے کی کوشش کرے گی۔
