اشتعال انگیز بیانات‘ نفرت پھیلانے اور اپوزیشن کو بدنام کرنے کا الزام
بنگلورو: کرناٹک میں اسمبلی انتخابات جیسے جیسے قریب آرہے ہیں تمام سیاسی جماعتوں کی تشہیر عروج پر ہے اور مختلف قائدین کے بیانات میں الزام برائے الزام کا سلسلہ بھی جاری ہے۔ دریں اثنا، کانگریس پارٹی نے بی جے پی پر الزام عائد کیا ہے کہ ایک ریالی کے دوران اشتعال انگیز تقاریر کی گئیں اور نفرت پھیلائی گئی۔ کانگریس قائدین نے اس کے خلاف بنگلورو کے ہائی گراؤنڈس پولیس اسٹیشن میں امت شاہ اور بی جے پی کے خلاف شکایت درج کرائی ہے۔کانگریس کا الزام ہے کہ بی جے پی نے مبینہ طور پر اشتعال انگیز بیانات دیئے، دشمنی اور نفرت کو فروغ دیا اور اپوزیشن کو بدنام کرنے کا کام کیا۔ جن قائدین نے شکایت درج کروائی ہے ان میں رندیپ سنگھ سرجے والا، ڈاکٹر پرمیشور اور ڈی کے شیوکمار شامل ہیں۔اس سے قبل کانگریس لیڈر رندیپ سنگھ سرجے والا نے بھی اس بارے میں ٹوئٹ کیا تھا۔ اس میں انہوں نے کہا تھا کہ بی جے پی اور امیت شاہ روزانہ کرناٹک کی توہین کر رہے ہیں۔ جے پی نڈا کا کہنا ہے کہ کناڑیوں کو مودی کے آشیرواد کی ضرورت ہے۔ انہوں نے سوال کیا کہ کیا انہیں ریاست کو چلانے کے لیے ایک بھی کناڈیگا نہیں مل سکتا کہ اسے مودی کو سونپنا ہے؟پرینکا گاندھی نے کرناٹک میں بی جے پی کے صدر جے پی نڈا کے ایک حالیہ تبصرہ پر حکمراں پارٹی پر بھی سخت تنقید کی تھی۔ انہوں نے کہا تھا کہ کرناٹک کو موجودہ دور کے کسی لیڈر کے آشیرواد کی ضرورت نہیں ہے اور عوام کو ‘ووٹ نہ دینے پر وزیر اعظم نریندر مودی کے آشیرواد’ سے محروم کرنے کی دھمکی دینا ریاست کے لوگوں کی توہین ہے۔