جئے پور :15؍مئی ( ایجنسیز )راجستھان کے ہوا محل حلقے سے بی جے پی ایم ایل اے بال مکند آچاریہ ایک بار پھر تنازعہ میں گھر گئے ہیں۔ سوشل میڈیا پر ان کا ایک ویڈیو وائرل ہو رہا ہے جس میں وہ قومی پرچم سے ناک یا منہ صاف کرتے نظر آ رہے ہیں۔ اس واقعے پر کانگریس نے سخت اعتراض کرتے ہوئے اسے قومی پرچم کی توہین قرار دیا ہے۔کانگریس کے رکن پارلیمان عمران پرتاپ گڑھی نے ویڈیو شیئر کرتے ہوئے کہا کہ یہ وہی صاحب ہیں جو روزانہ جے پور کی عوام کے حب الوطنی کا سرٹیفکیٹ بانٹتے ہیں لیکن خود ترنگے سے ناک صاف کر رہے ہیں۔ کیا قومی پرچم کا احترام اس طرح کیا جاتا ہے؟ یہ ایک سنگین جرم ہے۔ عمران پرتاپ گڑھی کی ویڈیو کوایکس پر خوب شیئر کیا جا رہی ہے اور صارفین کی جانب سے شدید تنقید کی جا رہی ہے۔دریں اثنا، کانگریس رہنما پون کھیڑا نے بھی بال مکند آچاریہ پر طنز کرتے ہوئے کہا کہ یہ وہی ہیں نا جو اکثر بریانی کی دکانوں کے باہر پائے جاتے ہیں؟ ان کا اشارہ بی جے پی کے رکن اسمبلی کی جانب سے گوشت کے دکانوں کے خلاف چلائی گئی تحریک اور ماضی کے ان بیانات کی طرف تھا جن میں انہوں نے مسلمانوں کونشانہ بنایا تھا۔بتایا جا رہا ہے کہ یہ ویڈیو بی جے پی کی ’ترنگا یاترا’ کے دوران کی ہے، جو حال ہی میں ’آپریشن سندور‘ کی کامیابی کے بعد پورے ملک میں منعقد کی جا رہی ہے۔ ویڈیو میں بال مکند آچاریہ ایک ہاتھ میں گدا اور دوسرے میں ترنگا اور ایک پلے کارڈ لیے ہوئے دکھائی دے رہے ہیں جس پر ’آپریشن سندور پراکرم ابھوت پورو‘ لکھا ہے۔جیسے ہی ویڈیو میں وہ اپنا منہ یا ناک صاف کرتے ہیں قریب میں موجود ایک شخص انہیں کپڑا دیتا ہے جس کے بعد وہ ترنگے کے بجائے اس کپڑے کا استعمال کرتے ہیں۔اب دیکھنا یہ ہے کہ بی جے پی اس واقعے پر کیا موقف اختیار کرتی ہے اور آیا بال مکند آچاریہ کی جانب سے معذرت یا وضاحت سامنے آتی ہے یا نہیں؟ کانگریس نے اس پر کارروئی کا مطالبہ کی اورکہا کہ ایم ایل اے کے خلاف قومی پرچم کی توہین کے تحت کیس درج کیا جائے۔
