بھوپال: مدھیہ پردیش کے شیو پوری ضلع کے کولاراس کے ایم ایل اے وریندر راگھونشی سمیت بھارتیہ جنتا پارٹی کے کئی لیڈروں نے آج کانگریس کی رکنیت لے لی۔ رگھوونشی نے دو دن قبل مرکزی وزیر جیوترادتیہ سندھیا کے ساتھ بی جے پی میں شامل ہونے والے لوگوں پر کئی الزامات عائد کرتے ہوئے بی جے پی کی رکنیت سے استعفیٰ دے دیا تھا۔ رگھوونشی کے علاوہ بی جے پی کے سابق ایم ایل اے بھنور سنگھ شیخاوت، دو بار جھانسی کے رکن پارلیمنٹ رہے سوجن سنگھ بندیلا کے بیٹے چندر بھوشن سنگھ بندیلا اور ریاست کے سابق وزیر داخلہ اور بھارتیہ جنتا پارٹی کے سینئر لیڈر اوماشنکر گپتا کے بھتیجے ڈاکٹر آشیش اگروال بھی کانگریس شامل ہوئے ۔ اس موقع پر ریاستی کانگریس صدر کمل ناتھ نے کہا کہ آج کا نوجوان کمیشن یا ٹھیکہ نہیں بلکہ روزگار چاہتا ہے ۔ انہوں نے کہا کہ کانگریس میں شامل ہونے والے سبھی لوگ مدھیہ پردیش کے مستقبل کے محافظ ہیں۔ انہوں نے الزام لگایا کہ بی جے پی نے مدھیہ پردیش کو گھپلے اور بدعنوانی کی ریاست بنا دیا ہے ۔ اس موقع پر ریاستی کانگریس کے جنرل سکریٹری انچارج رندیپ سنگھ سرجے والا نے کہا کہ پچھلی بار اسمبلی انتخابات میں بی جے پی کے 13 وزراء ہارے تھے ۔ اس بار اس کے برعکس ہوگا اور حکومت کے 31 وزراء الیکشن ہار جائیں گے ۔
کانگریس کو انتخابات میں کامیابی دلائیں تو سب کام ہوں گے
بھیلواڑہ: راجستھان کے وزیر اعلی اشوک گہلوٹ نے عوامی نمائندوں سے کہا ہے کہ اب کام کا مطالبہ کرنا بند کر دیں، کانگریس حکومت کو انتخابات میں کامیابی دلائیں، اس کے بعد ان کی طرف سے کام سے متعلق تمام مطالبے پورے کئے جائیں گے ۔ گہلوٹ ہفتہ کو بھیلواڑہ سرکٹ ہاؤس میں عوامی سماعت کے دوران بول رہے تھے ۔
