انقرہ : ترکی کے خفیہ ادارے کے ایجنٹوں نے ملک سے باہر ایک کارروائی کرتے ہوئے امریکہ میں مقیم ترک عالم فتح اللہ گولن کے بھتیجے کو گرفتار کر لیا ہے۔خفیہ ایجنسی نے انھیں انقرہ منتقل کردیا ہے جہاں اب ان کے خلاف مقدمہ چلایا جائے گا۔ اے پی نے ترک سرکاری خبررساں ایجنسی اناطولو کے حوالے سے بتایا ہیکہ ’’صلاح الدین گولن دہشت گرد قرار دی گئی تنظیم کی نمائندگی کے الزام میں ترکی کو مطلوب تھے۔انھیں ترکی کے خفیہ ادارے ایم آئی ٹی نے ایک آپریشن میں گرفتار کیا ہے۔‘‘البتہ اناطولو کی رپورٹ میں یہ نہیں بتایا کہ صلاح الدین گولن کو کہاں سے گرفتار کیا گیا اور انہیں کب ترکی واپس لایا گیا۔ تاہم یہ خیال کیا جاتا ہیکہ فتح اللہ گولن کے بھتیجے افریقی ملک کینیا میں مقیم تھے۔ گولن تحریک سے وابستہ افراد کی بیرون ممالک سے گرفتاریوں کے سلسلے کی یہ تازہ کڑی ہے۔ ترک حکومت گولن تحریک کو 2016ء میں ملک کے اندر ناکام فوجی بغاوت کا مورد الزام ٹھہراتی چلی آرہی ہے۔ فتح اللہ گولن ترک صدر رجب طیب اردغان کے سابق اتحادی رہ چکے ہیں۔ وہ اس وقت امریکہ کی ریاست پنسلوانیا میں جلاوطنی کی زندگی گزار رہے ہیں۔ وہ ترکی میں ناکام فوجی بغاوت میں ملوّث ہونے کے الزامات کی تردید کرچکے ہیں۔ترکی نے ان کے نیٹ ورک کو ’’فتح اللہ ٹیررسٹسٹ آرگنائزیشن‘‘(فیٹو) کا نام دیتے ہوئے دہشت گرد گروپ قرار دیا ہے۔