نئی دہلی: کانگریس کے سابق صدر راہول گاندھی نے جے پور گولڈن ہاسپٹل میں داخل کورونا کے کئی مریضوں کی آکسیجن نہ ملنے سے موت ہونے پر گہرے رنج و غم کا اظہار کرتے ہوئے متاثرہ کنبوں کے تئیں تعزیت کا اظہار کیا ہے۔ راہول گاندھی نے ہفتہ کو سوشل میڈیا پر جاری تعزیتی پیغام میں کہا کہ ’’آکسیجن کی کمی کے سبب دلی کے جے پور گولڈن ہاسپٹل میں مریضوں کی موت کی خبر کافی رنجیدہ ہے۔ مرنے والوں کے کنبوں کو تعاون مہیا کرانے کی درخواست کرتا ہوں‘‘۔اس سے قبل انہوں نے ایک دیگر پیغام میں کورونا کے سبب پیدا ہوئی موجودہ صورتحال کو ناقابل برداشت قرار دیتے ہوئے حکومت سے آنے والی صورتحال سے نمٹنے کے لئے تیار رہنے کی درخواست کرتے ہوئے ٹوئٹ کیا کہ ’’میں مرکزی حکومت سے اپیل کرتا ہوں کہ وہ پی آر یعنی تشہیر اور غیر ضروری پروجیکٹوں پر خرچ کرنے کے بجائے ویکسین، آکسیجن اور دیگر صحت کی خدمات پر توجہ دیں۔ آنے والے دنوں میں یہ بحران مزید سنگین ہو جائے گا۔ اس سے نمٹنے کے لئے ملک کو تیار رہنا ہوگا۔ موجودہ حالت ناقابل برداشت ہے‘‘۔
