حیدرآباد۔ تلنگانہ اور اے پی کے بیشتر علاقوں میں درجہ حرارت 40ڈگری درج کیا جارہا ہے ۔ماہ مارچ سے ہی درجہ حرارت میں اضافہ ہوتاجارہا ہے اور محکمہ موسمیات نے انتباہ دیا ہے کہ آئندہ دنوں درجہ حرارت میں مزید اضافہ ہوگا۔رات کے درجہ حرارت میں بھی اضافہ ہورہا ہے ۔محکمہ کے مطابق درجہ حرارت معمول سے زائد ریکارڈ کیا گیا ہے ۔ دونوں ریاستوں کے اضلاع کے علاوہ مختلف مقامات پر شدید گرمی کی لہر دیکھی جارہی ہے ۔گرمی سے بچنے لوگ مختلف تدابیر اختیار کررہے ہیں۔دوپہر کے وقت ٹریفک میں کمی دیکھی جارہی ہے ۔واٹر کولرس، ایر کولرس کے علاوہ مشروبات کی فروخت میں اضافہ ہوگیا ۔ڈاکٹرس نے چھوٹے بچوں اور ضعیف افراد کو مشورہ دیا کہ وہ گھروں میں رہیں۔عوام کا کہنا ہے کہ گذشتہ برسوں کے مقابلے اس مرتبہ گرمی کافی ہے ۔صبح 9بجے سے ہی شدید گرمی کا آغاز ہورہا ہے ۔
