مرکز سے اضافی ویکسین حاصل کرنے کی مساعی، کورونا کے علاج سے بہتر احتیاط
حیدرآباد: وزیر صحت ای راجندر نے کہا کہ حکومت عوام کو کورونا وباء سے بچانے کیلئے ہر ممکن قدم اٹھا رہی ہے، ضرورت پڑنے پر کئی ہزار کروڑ روپئے خرچ کرنے کیلئے بھی حکومت تیار ہے۔ وزیر صحت نے میڈیا کے نمائندوں سے بات چیت کرتے ہوئے کہا کہ چیف منسٹر کے چندر شیکھر راؤ کی اولین ترجیح ریاست کے عوام کو کورونا سے بچانا ہے۔ انہوں نے ریاست میں کورونا کیسیس میں اضافہ پر تشویش کا اظہار کیا ۔ رام نومی کے موقع پر وزیر صحت نے حضور آباد میں سیتا رام کلیان اتسوم میں شرکت کی۔ انہوں نے کہا کہ عوام کو حکومت کی جانب سے جاری کردہ گائیڈ لائینس پر سختی سے عمل کرنا چاہئے ۔ راجندر نے کہا کہ کورونا کے علاج سے بہتر عوام کی احتیاط ہے ۔ اگر ہر شخص کورونا قواعد پر عمل کرنے لگ جائیں تو دوسری لہر کو کمزور کیا جاسکتا ہے ۔ انہوں نے کہا کہ گزشتہ ایک ہفتہ میں کیسیس کی تعداد میں اضافہ درج کیا گیا اور حکومت نے سرکاری دواخانوں میں آکسیجن اور بستروں کی فراہمی پر توجہ مرکوز کی ہے۔ راجندر نے کہا کہ آکسیجن اور بستروں کے بارے میں پھیلائی جانے والی افواہوں پر عوام توجہ نہ دیں۔ سرکاری دواخانوں میں علاج کی بہتر سہولتیں موجود ہے۔ انہوں نے کہا کہ چیف منسٹر بہت جلد صحت یاب ہوجائیں گے اور عوامی خدمات میں مصروف ہوجائیں گے۔ انہوں نے تلنگانہ میں کورونا ویکسین کی قلت کی اطلاعات کو مسترد کردیا ۔ انہوں نے کہا کہ مرکز سے مزید ویکسین کیلئے درخواست کی گئی ہے کیونکہ 18 سال سے ویکسین کی خوراک دینے کا فیصلہ کیا گیا ہے۔ وزیر صحت نے کہا کہ دواخانوں میں آکسیجن کی فراہمی کیلئے مرکز سے تعاون کی درخواست کی گئی ۔ انہوں نے بتایا کہ سرکاری دواخانوں میں ریمیڈی سیور انجکشن دستیاب رکھا گیا ہے ۔ انہوں نے ڈاکٹرس کو مشورہ دیا کہ وہ آکسیجن کا غیر ضروری استعمال کرتے ہوئے ضائع نہ کریں۔ انہوں نے کہا کہ چیف منسٹر کے سی آر اور وزیر آئی ٹی کے ٹی آر نے انہیں دواخانوں میں آکسیجن کی سربراہی کے بارے میں توجہ دلائی ہے۔