برطانوی کمپنی ’’اِن شورمائی ٹرپ‘‘ کے سروے میں انکشاف ، دبئی تیسرے نمبر پر
دبئی: تنہا سفر کرنے والی خواتین کے لیے مدینہ منورہ دنیا کا محفوظ ترین شہر قرار دیا گیا ہے۔ میڈیا کے مطابق برطانوی ادارے
Insure My Trip
نے دنیا بھر سے تنہا سفر کرنے والی خواتین کے لیے محفوظ ترین شہر کی فہرست جاری کی ہے۔ادارے نے کہا ہے کہ مدینہ دنیا کا محفوظ ترین شہر اس اعتبار سے بھی ہے کہ یہاں جرائم کی شرح انتہائی کم ہے۔ادارے نے فرانس کے دار الحکومت پیرس کو مسافر خواتین کے لیے سب سے کم محفوظ شہر قرار دیا ہے۔ادارے نے اپنی تحقیق متعدد بنیادوں پر کی ہے جن میں رات کے وقت تنہا خواتین کا سفر کرنا، پر امن طریقے سے گھومنا پھرنا، جرائم کی شرح کم ہونا اور دوسرے لوگوں سے تعاون اور احترام حاصل کرنا شامل ہے۔فہرست میں دوسرے نمبر پر تھائی لینڈ کا شہر چیانگ مائی ہے، تیسرے نمبر پر دبئی ہے، چوتھے نمبر پر جاپان کا شہر کیوٹو ہے جبکہ پانچویں نمبر پر چین کا شہر ماکاؤ ہے۔دوسری طرف جوہانسبرگ ، کوالالمپور اور دہلی کو تنہا سفر کرنے والی خواتین کیلئے انتہائی غیرمحفوظ قرار دیا گیا ہے ۔