بنکاک: تھائی لینڈ کے دارالحکومت میں ڈبل ڈیکر مسافر بردار بس خوفناک حادثہ کا شکار ہوگئی جس کے نتیجہ میں 14 افراد ہلاک اور 32 زخمی ہوگئے۔تھائی لینڈ کے دارالحکومت بنکاک میں مسافر بس سدرن ٹرمینل سے 46 مسافروں کو لے کر سونگخلا کے ضلع نتھاوی جا رہی تھی کہ حادثے کا شکار ہوگئی۔مسافر بس ممکنہ طو پر تیز رفتاری کے باعث ڈرائیور سے بے قابو ہوکر ایک درخت سے جا ٹکرائی۔ تصادم اتنا خوفناک تھا کہ بس کے اگلے حصے کے دو ٹکڑے ہوگئے۔ پولیس کا کہنا ہیکہ مسافر بس کے بریک فیل ہوجانے کا امکان بھی ہے۔ اصل صورتحال تفتیش مکمل ہونے کے بعد سامنے آئے گی۔ حادثہ کی تحقیقات کیلئے انکوائری کمیٹی تشکیل دیدی گئی۔ زخمیوں میں سے 13 کی حالت تشویشناک بتائی جا رہی ہے۔ ہلاکتوں میں اضافہ کا خدشہ بھی ظاہر کیا جا رہا ہے۔عالمی ادارہ صحت کے مطابق تھائی لینڈ میں روڈ ایکسیڈنٹ میں ہونے والی اموات کی شرح دنیا میں سب سے زیادہ ہے۔ ہر سال تقریباً 20 ہزار افراد ٹریفک حادثات میں ہلاک ہوجاتے ہیں۔
