دہرادون ؍ نئی دہلی : بی جے پی ایم پی تیرتھ سنگھ راوت کو آج نئے چیف منسٹر اتراکھنڈ کی حیثیت سے حلف دلایا گیا۔ گزشتہ تریویندر سنگھ راوت نے اس عہدہ سے استعفیٰ دیا تھا۔ گورنر بے بی رانی واوریا نے دہرہ دون میں راج بھون میں منعقدہ سادہ تقریب میں نئے چیف منسٹر کو عہدہ کا حلف دلایا۔ قبل ازیں بی جے پی قانون ساز پارٹی کی میٹنگ میں سینئر لیڈر اور پوڑی گڑھوال لوک سبھا حلقہ کے رکن پارلیمنٹ تیرتھ سنگھ راوت کو اتراکھنڈ کے دسویں چیف منسٹر کے طور پر منتخب کیا گیا۔قانون ساز پارٹی کے ممبروں کا اجلاس چہارشنبہ کی صبح 10بجے دہرادون میں پارٹی کے ریاستی دفتر میں منعقد ہوا۔ سبکدوش چیف منسٹر تروندر سنگھ راوت نے تیرتھ سنگھ راوت کے نام کی تجویز پیش کی ، جسے مرکز کے نگران رمن سنگھ اور پارٹی کے ریاستی انچارج دشینت گوتم کی موجودگی میں متفقہ طور پر قبول کرلیا گیا۔ قابل ذکر ہے کہ پارٹی میں داخلی جھگڑے کے بعد سینئر قائدین کے کہنے پر تریوندر سنگھ راوت نے منگل کو چیف منسٹر کے عہدہ سے استعفیٰ دے دیا تھا۔
