بی جے پی کی ’ترنگا یاترا‘ پر اکھلیش یادو کا طنز
لکھنؤ:سماجوادی پارٹی کے قومی صدر اکھلیش یادو نے جنگ بندی کے بعد بی جے پی کی ’ترنگا یاترا‘ پر سخت تنقید کی ہے۔ مدھیہ پردیش میں بی جے پی لیڈر وجے شاہ کے کرنل صوفیہ پر بیان اور بلیا میں بی جے پی لیڈر کے وائرل ویڈیو سمیت کئی مسائل پر اکھلیش یادو نے بی جے پی کو آڑے ہاتھوں لیا ہے۔ اکھلیش یادو 15 مئی کو ذاتی پروگرام میں شرکت کرنے کے لیے امیٹھی پہنچے تھے۔ وہاں ہند و پاک جنگ بندی کے موضوع پر بولتے ہوئے اکھلیش یادو نے کہا کہ جشن جیت کا ہونا چاہیے جنگ بندی کا نہیں۔ انہوں نے کہا کہ امن ہمارے ملک کے لیے سب سے اہم ہے لیکن اس کے ساتھ ہی بہت سارے ایشوز پر دیگر ممالک مداخلت نہ کریں وہی ہمارے ملک اور ہماری جمہوریت کی شناخت کے لیے بہتر ہے۔اکھلیش یادو کے مطابق خود مختاری ہماری سب سے بڑی اور سب سے پہلی پہچان رہی ہے۔ اکھلیش یادو نے مزید کہا کہ بی جے پی کا کردار اور چہرہ نہ صرف مدھیہ پردیش میں بلکہ بلیا اور بہار میں بھی بے نقاب ہوا ہے۔ جو لوگ سوشل میڈیا پر ہیں وہ مجھ سے بہتر سمجھتے ہوں گے۔ ہائی کورٹ نے از خود نوٹس لے کر مدھیہ پردیش کے وزیر کے خلاف ایف آئی آر درج کرنے کا حکم دیا ہے۔ اکھلیش یادو کے مطابق اس وزیر نے ماضی میں ملک کی مشہور اداکارہ کے پروگرام کو روکا تھا۔ اس وقت اگر بی جے پی حکومت ان کے خلاف کارروائی کی ہوتی تو آج ملک کی کرنل صوفیہ قریشی کے ساتھ اس طرح کا سلوک کرنے کا انہیں موقع نہیں ملتا۔ ایسا نہیں ہے کہ پہلی بار خواتین کے تئیں بی جے پی کا ایسا کردار دیکھا گیا ہے، بی جے پی پارٹی ایسا ہی کرتی ہے۔