کابل ۔ افغان حکام نے کہا ہے کہ ننگر ہار کے شہر جلال آباد کی اس جیل کا کنٹرول حاصل کر لیا گیا ہے، جس پر دولت اسلامیہ کے جنگجوؤں نے گزشتہ روز حملہ کیا تھا۔ اس کارروائی میں 39 افراد ہلاک ہوئے جبکہ دولت اسلامیہ کے جنگجو جیل میں قید اپنے 400 فائٹرز کو رہا کرانے میں کامیاب ہو گئے۔ حکام نے بتایا ہے کہ جیل پر حملے کے دوران کم ازکم 10 جہادیوں کو بھی ہلاک کیا گیا۔ باقی ماندہ ہلاک ہونے والوں میں جیل کے قیدی، شہری اور سکیورٹی فورسیس کے اہلکار شامل ہیں۔ اس بارے میں سرکاری اعدادوشمار جاری نہیں کیے گئے ہیں۔ طالبان اور امریکہ کے مابین امن معاہدہ کے تحت امریکی اور ناٹو فورسیس کے افغانستان سے انخلا کے بعد اس وسطی ایشیائی ملک میں اس جہادی تنظیم کی کارروائیوں سے تشدد میں اضافہ ہو سکتا ہے۔
