الیکشن کمیشن نے آج صبح 11 بجے تک کی دی مہلت
نئی دہلی: سابق چیف منسٹر دہلی اروند کجریوال کے جمنا کے پانی میں زہر ملانے کے بیان پر تنازعہ شدت اختیار کرگیا ہے ۔ الیکشن کمیشن نے کجریوال کو نوٹس جاری کرتے ہوئے ان سے پانچ سوالات پر وضاحت مانگی ہے۔ کمیشن نے انہیں بعض سوالات کے جوابات جمع کرانے کیلئے کل صبح 11 بجے تک کی مہلت دی ہے۔ سوالات اس طرح ہیں کہ ہریانہ حکومت نے جمنا میں کون سا زہر ملایا؟ زہر کی مقدار، نوعیت اور اس کے اثرات کے ثبوت کیا ہیں؟ زہر کہاں پایا گیا تھا؟ دہلی جل بورڈ کے کن انجینئروں نے زہر کی کہاں اور کیسے شناخت کی؟ زہریلے پانی کو دہلی میں داخل ہونے سے روکنے کیلئے کیا اقدامات کیے گئے؟اروند کجریوال نے اپنے بیان میں کہا تھا کہ ہریانہ حکومت کی جانب سے دہلی کو فراہم کیا جانے والا پانی انتہائی آلودہ اور زہریلا ہے۔ ان کے مطابق یہ پانی اتنا آلودہ ہے کہ دہلی کے واٹر ٹریٹمنٹ پلانٹس بھی اسے صاف کرنے کے قابل نہیں ہیں۔ کجریوال کے اس بیان پر بی جے پی نے شدید ردعمل دیا تھا اور ان کے الزامات کو جھوٹا اور بے بنیاد قرار دیا تھا جبکہ کانگریس کا کہنا تھا کہ کجریوال نے جھوٹے الزامات عائد کئے ہیں اور اگر اس میں ذرا سی بھی سچائی ہے تو انہیں قانونی چاراجوئی کرنی چاہئے۔