سری نگر : جموں و کشمیر نیشنل کانفرنس کے ٹریجرر شمی اوبرائے نے الیکشن کمیشن آف انڈیا کی طرف سے بلائی گئی میٹنگ میں شرکت کی۔ میٹنگ میں ملک کی مختلف سیاسی جماعتوں کے نمائندے شامل تھے ، جس میں ملک بھر میں کام کرنے والے 30 کروڑ گھریلو مائیگرنٹوں کو ووٹنگ کی سہولت فراہم کرنے کیلئے ریموٹ الیکٹرانک ووٹنگ مشینوں کا استعمال کرنے کیلئے بلایا گیا تھا۔ میٹنگ میں شمی اوبرائے نے اس مسئلہ پر بات کرتے ہوئے کہا کہ جب حکومت گھریلو تارکین وطن کو اپنے حق رائے دہی کا استعمال کرنے کی سہولت فراہم کرنے کے بارے میں فکر مند ہے تو جموں و کشمیر کے ایک کروڑ 40لاکھ لوگ اپنے جمہوری حقوق کے استعمال سے بدستور محروم ہیں۔ انہوں نے اس بات پر تشویش کا اظہار کیا کہ جموں و کشمیر کے لوگوں کو ان کے جمہوری حقوق سے محروم رکھ کر اپنی حکومت کا انتخاب کرنے سے دور رکھا جا رہا ہے جس سے ان کے روزمرہ کے مسائل کو موثر طریقے سے حل کیا جا سکتا ہے ۔
چیف الیکشن کمشنر نے شمی اوبرائے کی طرف سے اٹھائے گئے نکات کو تسلیم کیا اور کہا کہ کمیشن بھی جموں و کشمیر میں اسمبلی انتخابات کے بارے میں فکر مند ہے ۔
چیف الیکشن کمشنر نے کہا کہ انتخابات کی تیاریاں جاری ہیں اور حلقوں کی حد بندی، انتخابی فہرستوں پر نظرثانی اور بوتھ کی شناخت کے حوالے سے بہت کام کیاگیا ہے