ملبرن: ہندوستانی کرکٹ ٹیم کے کپتان روہت شرما کا کہنا ہیکہ ہندوستان اور پاکستان کے درمیان میچ جو بھی جیتے اس کو اعتماد ملتا ہے، جس طرح آج جیتے اس سے ہمارا اعتماد بڑھے گا۔ روہت نے کہا کہ حارث کو جو دو چھکے پڑے اس نے میچ ہمارے قریب کیا۔ ملبرن میں سنسنی خیز میچ کے بعد پریس کانفرنس میں روہت شرما نے کہا کہ ویراٹ کوہلی سے ہمیشہ امیدیں ہوتی ہیں، اس لیے زیادہ نظریں بھی اُن پر ہوتی ہیں۔ ویراٹ اور ہاردک پانڈیا کی شراکت نے آج جیت میں اہم کردار ادا کیا۔ یہ صرف ویراٹ کی نہیں بلکہ ہندوستان کی بھی بہترین اننگز ہے۔ روہت نے کہا کہ 13ویں اوور تک ہم میچ میں بہت پیچھے تھے مگر ویراٹ اور پانڈیا نے اچھا کھیلا۔ پاکستان کی بولنگ کے سامنے آخری پانچ اوورز میں 60 رنز اسکور کرنا آسان نہ تھا۔ ہم اپنا مڈل آرڈر جلدی میدان پر بھیجنا نہیں چاہ رہے تھے۔ ہندوستانی کپتان نے ویراٹ کی بیاٹ سے حارث رؤف کو پڑنے والے دو چھکوں کو میچ کا ’ٹرننگ پوائنٹ‘ قرار دیا اور کہا کہ حارث کو جو دو چھکے پڑے اس نے میچ ہمارے قریب کردیا۔ اس کے بعد بھی ویراٹ نے جم کر کھیلا اور جیت تک میدان پر ڈٹے رہے۔ اُن کے ساتھ روی چندرن اشوین ناٹ آؤٹ رہے۔ اندازہ ہوگیا تھا کہ آخر میں ایک اسپنر کا اوور باقی رہے گا۔ خیال رہے کہ آئی سی سی ٹی ٹوئنٹی ورلڈ کپ کے سوپر 12 مرحلے میں ہندوستان نے سنسنی خیز مقابلے کے بعد پاکستان کو شکست دے دی۔ ہندوستان نے پاکستان کا 160 رنز کا ہدف 6 وکٹوں کے نقصان پر آخری گیند پر حاصل کیا اور سنسنی خیز مقابلے کے بعد پاکستان کو 4 وکٹوں سے شکست دی۔
