قاضی محمد سراج الدین رضوی
حضرت مراد شاہ دھوتی رحمۃ اللہ تعالیٰ علیہ اورنگ آباد میں پیدا ہوئے ۔ آپ حضرت شاہ فاضل صفا چشتی کے خلیفہ تھے جو حضرت امین الدین اعلیٰ بیجاپور کے خلیفہ تھے ۔ آپ اورنگ آباد سے آصف جاہ اول کے دورِ حکومت میں حیدرآباد تشریف لائے اور یہیں سکونت اختیار کرلی ۔ آپ کی ساری زندگی رُشد و ہدایت عبادت و ریاضت کے ساتھ اﷲ کے دین کو پھیلانے میں گذر گئی ۔ آپ کا خاصہ فقر تھا اور فقر کا عالم یہ تھا کہ آپ ہمیشہ لنگی دھوتی ہی باندھ کر رہا کرتے تھے اور اپنے لباس سے اس بات کا اظہار کرتے کہ مومن تکبرانہ صفت کا حامل نہیں ہوتا اسی باعث آپ کا لقب مراد شاہ دھوتی مشہور ہوا ۔ آپ خود اپنے ہاتھ کا پکا ہوا کھانا ہی تناول کرتے ۔ آپ صاحب کرامت بزرگ گذرے ہیں ۔ آپ کا وصال ۱۱؍ جمادی الثانی ۱۱۴۰ ھ میں ہوا اور موضع ہلکاپور میں متصل روضہ عبدالوہاب قادریؒ کے قریب مراد نگر آصف نگر میں مدفون ہوئے۔ آپ ہی کے نام پر مراد نگر کا نام رکھا گیا ۔ آپ کا عرس شریف ہر سال ۱۱؍ جمادی الثانی کو بڑے ہی اہتمام کے ساتھ منایا جاتا ہے ۔
