غزہ :غزہ کے شمالی کے علاقے میں حماس کے ساتھ دو مختلف مقامات پر جھڑپوں میں 3 اسرائیلی فوجی ہلاک اور ایک شدید زخمی ہوگیا۔میڈیا کے مطابق اسرائیلی فوج کا پہلا اہلکار بیت لاہیا میں حماس کے اسنائپر کی فائرنگ میں مارا گیا جب کہ دوسرے مقام پر ایک جھڑپ میں مزید 2 اسرائیلی فوجی ہلاک ہوگئے۔اسرائیلی فوج نے تصدیق کی ہے کہ حماس کے ساتھ جھڑپ میں مارے گئے فوجیوں میں پلاٹون کمانڈر کیپٹن ایڈن کینان، سارجنٹ یوگیو پازی اور اسٹاف سارجنٹ نوام ایتان شامل ہیں۔ان تینوں فوجیوں کی عمریں 21 اور 22 سال ہیں اور یہ کیفیر بریگیڈ کی نہشون بٹالین کے ساتھ منسلک تھے۔اسرائیلی فوج کے ترجمان کا کہنا ہے کہ اس واقعے میں بٹالین کا ایک اور سپاہی شدید زخمی ہوا جس کی حالت تشویشناک ہے۔ حماس کے ساتھ برّی جنگ میں اب تک مارے گئے اسرائیلی فوجیوں کی تعداد 378 ہوگئی۔ سارجنٹ یوگیو پازی سابق چیف آف اسٹاف اور سابق جنگی کابینہ کے مبصر وزیر گاڈی آئزن کوٹ کا بھتیجا تھا۔
