نئی دہلی: صدر رامناتھ کووند نے زرعی شعبہ میں ترقی کیلئے کسانوں، ملک کی سرحدوں کی سلامتی یقینی بنانے میں کامیاب رہے جوانوں اور کووڈ سے نمٹنے اور ترقی کے مختلف شعبوں میں خدمات کیلئے سائنسدانوں کومبارک باد دیتے ہوئے کہا ہے کہ حکومت کسانوں سمیت تمام طبقوں کی فلاح وبہبود کیلئے پوری طرح پرعزم ہے۔ کووند نے پیر کو 72 ویں یوم جمہوریہ کے موقع پر قوم سے اپنے خطاب میں کہا کہ خود اعتمادی کے ساتھ ہندوستان نے بہت سے شعبوں میں بڑے اقدامات کیے ہیں۔ ہماری معاشی اصلاحات کو پوری رفتار سے آگے بڑھنے کیلئے نئے قوانین بنا کر زراعت اور لیبر کے شعبوں میں ایسی اصلاحات کی گئیں جن کی طویل عرصے سے توقع کی جارہی تھی۔ انہوں نے کہا کہ شروع میں ان اصلاحات کے بارے میں خدشات پیدا ہوسکتے ہیں لیکن اس میں کوئی شک نہیں کہ حکومت کسانوں کے مفادات کے لئے پوری طرح پابند عہدہے۔انہوں نے کہا کہ اتنے بڑے ملک کو خوراک اور دودھ کی مصنوعات پر خود کفیل بنانے پر کسانوں بہن بھائیوں کو تمام ملک کے شہریوں کی طرف سے دلی مبارکباد پیش کرتے ہیں۔ نامساعدحالات،بہت سارے چیلنجوں اور کوویڈ کی تباہی کے باوجود ہمارے کسان بھائیوں اور بہنوں نے زرعی پیداوار میں کوئی کمی نہیں آنے دی۔ یہ ملک ہمارے کسانوں کی فلاح و بہبود کے لئے پوری طرح پرعزم ہے۔ انہوں نے کہا کہ ہم سب کو اپنے فوجیوں کی بہادری، حب الوطنی اور قربانی پر فخر ہے۔
