حیدرآباد22مارچ(یواین آئی)قومی دارالحکومت کے دہلی انٹرنیشنل ایرپورٹ پر کل ایک مشتبہ موت کا معاملہ سامنے آیا ہے۔ایک شخص جو ہندوستان پہنچا تھا ایرپورٹ پر گر پڑا جس کے نتیجہ میں اس کی موت واقع ہوگئی ہے ۔اس 44سالہ شخص کا تعلق حیدرآباد کے بوئن پلی سے ہے ۔وہ انڈونیشیا سے ہندوستان پہنچا تھا۔ایرپورٹ پر تھرمل اسکریننگ اور مناسب صحت کے پروٹوکولس کے بعد وہ امیگریشن کلیرنس کا انتظار کررہا تھا کہ اچانک گرپڑا جس کے نتیجہ میں اس کی موت واقع ہوگئی۔یہ حیدرآبادی شخص انڈیگو ایرلائنس کا ملازم ہے اور اس کو انڈونیشیا کے جکارتہ میں دیگر ٹیم ارکان کے ساتھ تعینات کیاگیا تھا۔کرونا وائرس کے پھوٹ پڑنے کے نتیجہ میں اس ٹیم سے خواہش کی گئی تھی کہ وہ فوری طورپر ہندوستان واپس آجائے ۔وہ اپنی ٹیم کے ساتھ دہلی پہنچا۔ایرپورٹ پر تمام امور کی تکمیل کے بعد وہ امیگریشن میں اپنی باری کا منتظر تھا کہ وہ گر پڑا۔ایرپورٹ کی ایمرجنسی ٹیم نے اس کو ابتدائی طبی امداد فراہم کی تاہم تب تک کافی تاخیر ہوگئی تھی۔اس کو مردہ قراردیاگیا۔اس کی لاش کو قریبی اسپتال منتقل کیاگیا۔