بیجنگ : چینی سائنس دانوں نے خبردار کیا ہے کہ 46 ممالک میں لاکھوں مرغیوں کو ہلاک کرنے والا خطرناک برڈ فلو ’’ایچ5این 8‘‘چند برس میں عالمی وبا کی شکل اختیار کرسکتا ہے۔ تحقیقی مجلے سائنس میں شائع کیے گئے مقالے میں وائفینگ شی اور جارج ایف گاؤ نے برڈ فلو وائرس کی مختلف اقسام اور ان میں جینیاتی طور پر ہونے والی تبدیلیوں کا جائزہ لینے کے بعد یہ خدشہ ظاہر کیا ہے۔ ان کا کہنا ہے ’’ایچ5این 8‘‘برڈ فلو وائرس بہت تیزی سے پھیل رہا ہے اور اس سے متاثر ہونے والے ممالک کی تعداد بھی بڑھتی جارہی ہے۔ شی اور گاؤ نے اپنی تحقیق میں روس کے ایک پولٹری فارم میں وائرس سے 7 ملازمین کے متاثر ہونے کا تذکرہ کیا ہے۔ یہ واقعہ دسمبر 2020 ء میں پیش آیا تھا، جس کی تصدیق کے بعد عالمی ادارہ صحت کو اس کی اطلاع فروری 2021 ء میں دی گئی تھی۔ یہ خبر اس لیے بھی تشویش ناک ہے، کیوں کہ اس برڈ فلو وائرس سے انسانوں کے متاثر ہونے کا یہ پہلا واقعہ ہے۔ ماہرین کا کہنا ہے کہ اگر وائرس کی بعض اقسام خود کو تبدیل کرکے پرندوں سے انسانوں میں منتقل ہونے اور انہیں بیمار کرنے کے قابل ہوچکی ہیں تو آنے والے مہینوں اور برسوں میں وہ مزید تبدیل ہو کر عالمی وبا کی صورت اختیار کرسکتی ہے۔