بیجنگ؍ جینیوا ؍ نئی دہلی ، 29 مئی (سیاست ڈاٹ کام) دنیا بھر میں کورونا وائرس (کوویڈ 19) سے متاثرہ افراد کی تعداد 58 لاکھ سے تجاوز کرگئی ہے ، جبکہ اب تک 3.60 لاکھ سے زائد افراد اس وبا سے مرچکے ہیں۔جان ہاپکنز یونیورسٹی کے سائنس اور انجینئرنگ کے مرکز (سی ایس ایس ای) کے جاری کردہ اعداد و شمار کے مطابق ، کورونا وائرس نے دنیا بھر میں 58,08,672 افراد کو متاثر کیا ہے جبکہ 3,60,289 افراد ہلاک ہوگئے ہیں۔امریکہ دنیا میں پہلے اور برازیل دوسرے اور روس کورونا وائرس کے معاملے میں تیسرے نمبر پر ہے ۔ دوسری طرف ، اس وبائی امراض کی وجہ سے ہلاکتوں کی تعداد میں بھی امریکہ پہلے نمبر پر ہے ، جبکہ برطانیہ دوسرے نمبر پر ہے اور اٹلی تیسرے نمبر پر ہے ۔ صرف امریکہ میں ہی دس لاکھ سے زیادہ افراد کورونا وبا کا شکار ہوچکے ہیں۔پچھلے 24 گھنٹوں کے دوران ہندوستان میں کورونا انفیکشن کے 7466 نئے کیس رپورٹ ہوئے ہیں اور 175 افراد لقمہ اجل بن چکے ہیں جبکہ 3414 مریضوں کو اس بیماری سے راحت ملی ہے ۔ جمعہ کے روز وزارت صحت اور خاندانی بہبود کی وزارت کے جاری کردہ اعداد و شمار کے مطابق ، ملک کی مختلف ریاستوں اور مرکزکے زیر انتظام علاقوں میں اب تک اس کے انفیکشن کی وجہ سے 1,65,799 افراد متاثر ہوئے ہیں اور 4706 افراد لقمہ اجل بن چکے ہیں ، جبکہ 71,106 افراد اس مرض سے نجات پا چکے ہیں۔عالمی طاقت سمجھے جانے والے ملک امریکہ میں اب تک ، 17,21,479 افراد کورونا وائرس سے متاثر ہوچکے ہیں ، جبکہ 1,01,597 افراد ہلاک ہوچکے ہیں۔ برازیل میں متاثرہ افراد کی تعداد ساڑھے چار لاکھ سے تجاوز کر گئی ہے ۔ یہاں 4,38,238 افراد اس سے متاثر ہوچکے ہیں اور 26،754 افراد لقمہ اجل بن چکے ہیں۔روس میں بھی ، کوویڈ 19 کا انفیکشن پھیلتا ہی جارہا ہے اور اب تک اس کے انفیکشن سے 3,79,051 افراد متاثر ہوئے ہیں جبکہ 4142 افراد اپنی زندگی سے ہاتھ دھو بیٹھے ہیں۔ برطانیہ میں بھی ، اس انفیکشن کی وجہ سے صورتحال خراب ہوتی جارہی ہے ۔ اب تک 2,70,508 افراد اس وبا سے متاثر ہوچکے ہیں اور 37,919 افراد فوت ہوچکے ہیں۔
