مودی کابینہ میں کوئی مسلم نہیں
ممبئی : بالی ووڈ اسٹار نصیرالدین شاہ نے لوک سبھا الیکشن 2024ء کے بعد تیسری مرتبہ نریندر مودی کے وزیراعظم ہند بننے کے تعلق سے اظہارخیال کیا ہے۔ دی وائر کو انٹرویو میں ویٹرن ایکٹر نے کہا کہ وزیراعظم مودی کسی طرح تیسری بار وزارت عظمیٰ پر فائز ہونے میں کامیاب ہوگئے۔ انتخابی مہم میں مسلمانوں کے خلاف ان کے متعدد بیانات کے تعلق سے پوچھنے پر نصیر نے کہا کہ شاید مودی کے پاس انتخابی کامیابی حاصل کرنے کیلئے اور کوئی راستہ نہیں رہ گیا تھا۔ اب مودی کابینہ میں کسی بھی مسلم نمائندہ کی عدم موجودگی کے تعلق سے نصیرالدین نے کہا کہ انہیں یہ جان کر اچھا نہیں لگا لیکن انہیں کوئی تعجب نہیں ہوا ہے۔ جس طرح مسلمانوں کے تعلق سے نفرت پھیلاتے ہوئے انتخابی کامیابی حاصل کی گئی، کابینہ کی تشکیل شاید اسی جذبہ کے ساتھ ہوئی ہے۔ تاہم نصیرالدین نے کہا کہ وہ مستقبل میں کسی وقت ضرور دیکھنا چاہیں گے کہ وزیراعظم مودی مسلمانوں کی ٹوپی بھی پہنیں گے جسے 2011ء میں ایک تقریب میں انہوں نے پہننے سے انکار کیا تھا۔ نصیرالدین شاہ نے کہا کہ مسلمانوں کی ٹوپی پہننے سے ان کے سماجی اور معاشی حالات تو نہیں سدھریں گے لیکن علامتی خیرسگالی اقدام ضرور ہوگا اور یہ پیام جائے گا کہ آپ (مسلم کمیونٹی) اور میں (وزیراعظم مودی) یکساں ملک کے شہری ہیں۔ مجھے آپ سے کوئی بیر نہیں۔