جالنہ ، 7نومبر (یو این آئی) مہاراشٹرا کے مراٹھا ریزرویشن تحریک کے رہنما منوج جارنگے پاٹل نے ایک سنسنی خیز الزام عائد کرتے ہوئے کہا ہے کہ سابق وزیر دھننجے منڈے نے ان کے قتل کی سازش رچی تھی۔ جارنگے کے مطابق، منڈے نے اس سازش کیلئے 2.5 کروڑ روپے خرچ کیے تھے ، جب کہ ان کی قریبی کارکن کنچن بھی اس میں شامل ہے ۔ انہوں نے مراٹھا برادری سے اپیل کی کہ وہ امن و ضبط برقرار رکھے اور پولیس کو تحقیقات کا موقع دے ۔ جارنگے پاٹل نے جالنہ میں پریس کانفرنس کرتے ہوئے بتایا کہ بیڑ پولیس نے جمعرات کو اس کیس کے سلسلے میں دو افراد کو گرفتار کیا ہے ۔ انہوں نے کہا کہ دھننجے منڈے نے پہلے انہیں بدنام کرنے کی کوشش کی، مگر ناکام رہے ، بعد ازاں ان کے قتل کی منصوبہ بندی کی، جو ناکام ہو گئی۔ بعد میں زہر دینے اور نشہ آور اشیاء کے ذریعے نقصان پہنچانے کی بھی کوشش کی گئی لیکن ہم ہوشیار تھے ، اس لیے وہ ناکام رہے ۔ انہوں نے الزام لگایا کہ منڈے نے ان کے خلاف مسلسل سازشیں کیں، جن کے شواہد موجود ہیں۔ پریس کانفرنس میں جارنگے نے ایک آڈیو کلپ بھی پیش کیا اور کہا کہ دھنیا، تم اب مضبوطی سے پھنس گئے ہو۔ یہ کوئی مذاق نہیں ہے ، تم نے حد پار کر دی ہے ۔
” انہوں نے اعلان کیا کہ وہ خود نارکو ٹیسٹ کیلئے تیار ہیں اور اس سلسلے میں وزارت داخلہ، عدالت اور کلکٹر دفتر میں درخواست داخل کریں گے ۔ دوسری جانب، دھننجے منڈے نے منوج جارنگے کے الزامات کو “بکواس” قرار دیتے ہوئے کہا کہ معاملے کی سی بی آئی سے تحقیقات کرائی جائے اور دونوں فریقوں – ان اور جارنگے – کا برین میپنگ اور نارکو ٹیسٹ کرایا جائے ۔ منڈے نے کہا کہ جھوٹ کے ذریعے سیاسی فائدہ اٹھانے والوں کو بے نقاب کیا جائے گا۔ جارنگے نے ردعمل دیتے ہوئے کہا، “میں تمہاری طرح نہیں ہوں دھنیا، میں جاٹاون ہوں۔ میں سماج کیلئے خون دینے کو تیار ہوں۔ اگر تم سچ بول رہے ہو تو پہلے خود ٹیسٹ کراؤ۔” انہوں نے کہا کہ قتل کے اس کیس میں آٹھ سے دس لوگ شامل ہیں جن میں دھننجے منڈے بھی ایک ہیں۔
