سکیوریٹی ایجنسیاں چوکس، تمام ساحلی علاقوں میں الرٹ‘ مختلف زاویوں سے تحقیقات
ممبئی : مہاراشٹرا کے رائے گڑھ ضلع میں ہری ہریشور ساحل کے پاس ایک مشتبہ کشتی دکھائی دی ہے۔ ابتدائی اطلاعات کے مطابق کشتی سے اے کے 47 سمیت کئی ہتھیار اور کارتوس دستیاب ہوئے ہیں ۔ اطلاع ملتے ہی پولیس سمیت کئی ادارے موقع پر پہنچ گئے ہیں۔ رپورٹ کے مطابق یہ کشتی عمان سیکورٹی کی اسپیڈ بوٹ ہے۔ تاہم کشتی میں کوئی شخص نہیں تھا۔ کشتی بہتی ہوئی ہندوستان آئی ہے۔ عام طور پر اس علاقہ میں پاکستانی کشتی ملنے کا امکان ہوتا ہے، جسے جاسوسی کیلئے استعمال کیا جاتا ہے۔ تاہم اس معاملہ میں ابھی اس بات کی ٹھوس اطلاع نہیں ہے کہ کشتی پاکستان سے آئی ہے یا نہیں۔ اطلاعات کے مطابق یہ بوٹ مسقط سے یوروپ جارہی تھی ۔ادھر اسمبلی میں اس واقعہ کی جانکاری دیتے ہوئے مہاراشٹرا کے نائب وزیر اعلی دیویندر فڑنویس نے کہا کہ ایک مشتبہ کشتی ملی ہے، اس کشتی کا نام لیڈی ہان ہے۔ پولیس کو کشتی سے 3 اے کے 47 ملے ہیں۔ اے ٹی ایس کو جانچ کرنے کا حکم دیا گیاہے۔ جگہ جگہ ناکہ بندی شروع کر دی گئی ہے۔ پولیس کو الرٹ رہنے کیلئے کہا گیا ہے۔انہوں نے یہ بھی کہا کہ ہم اس معاملہ کو لے کر مرکز سے بھی رابطے میں ہیں۔ بتا دیں کہ مشتبہ کشتی ملنے کے بعد مہاراشٹرا کے تمام ساحلی علاقوں کو الرٹ کر دیا گیا ہے۔ کل یعنی جمعہ کو پورے مہاراشٹرا میں دہی ہانڈی یعنی جنم اشٹمی کا تہوار ہے اور اس کے پیش نظر مہاراشٹرا پولیس کسی قسم کا خطرہ مول نہیں لینا چاہتی ہے اور اس وجہ سے سبھی اضلاع کی پولیس چوکس ہے۔سیکورٹی ایجنسیوں کے ذرائع کے مطابق رائے گڑھ معاملہ میں کشتی کی برآمدگی کے بعد انٹلی جنس محکمہ دہشت گردی کے پہلو پر بھی نظر رکھے ہوئے ہے۔ انٹلی جنس محکمہ کے ذرائع کے مطابق یہ آئی ایس آئی کی ایک چال بھی ہو سکتی ہے۔ جدید ترین ہتھیاروں بالخصوص اے کے 47 کی کھیپ عمان کے راستے ہندوستان بھیجنے کی خطرناک سازش ہے۔ تاکہ پاکستان انٹرنیشنل فورم پر خود کو پاک صاف ثابت کر سکے۔رپورٹ کے مطابق ایس پی رائے گڑھ اشوک نے ہری ہریشور ساحل کے قریب کشتی میں اے کے 47 ملنے کی تصدیق کی۔ انہوں نے اس بارے میں کوئی دیگر جانکاری شیئر نہیں کی کہ آیا یہ کشتی اسپیڈ بوٹ تھی یا کوئی اور کشتی۔ انہوں نے کہا کہ جانچ جاری ہے۔ ذرائع سے موصول ہونے والی معلومات میں بتایا گیا ہے کہ یہ آسٹریلیا میں بنی کشتی ہے، جس جگہ کشتی ملی ہے وہ ممبئی سے تقریباً 100 کلومیٹر دور ہے۔اس بوٹ کا تعلق آسٹریلیا سے بتایا گیا ہے ۔