نئی دہلی۔ ہندوستان کی 1983 ورلڈ کپ جیتنے والی ٹیم کے ہیرو راجر بنی ہندوستانی کرکٹ کنٹرول بورڈ (بی سی سی آئی) کے صدر کے طور پر سورو گنگولی کی جگہ لینے والے ہیں۔گنگولی گزشتہ تین سالوں سے بی سی سی آئی کے صدر ہیں اور وہ 18 اکتوبر کو ہونے والی بورڈ کی سالانہ جنرل میٹنگ (اے جی ایم) میں بنی کے لیے عہدہ چھوڑ دیں گے۔ایک ہفتے کے ہنگامے کے بعد یہ فیصلہ کیا گیا کہ بنگلور میں مقیم 67 سالہ بنی بورڈ کے 36 ویں چیئرمین ہوں گے۔مرکزی وزیر داخلہ امیت شاہ کے بیٹے جے شاہ مسلسل دوسری مدت کے لیے بی سی سی آئی کے سکریٹری کے عہدے پر برقرار رہیں گے۔ اس کے علاوہ شاہ آئی سی سی بورڈ میں گنگولی کی جگہ بھی لیں گے۔ بی سی سی آئی کے عہدیداروں میں واحد کانگریسی راجیو شکلا بورڈ کے نائب چیئرمین رہیں گے۔ وزیرکھیل انوراگ ٹھاکر کے چھوٹے بھائی ارون سنگھ دھومل اب انڈین پریمیئر لیگ (آئی پی ایل) کے چیئرمین ہوں گے۔ وہ برجیش پٹیل کی جگہ لیں گے۔ مہاراشٹر کے بی جے پی لیڈر آشیش شیلار بورڈ کے نئے خزانچی ہوں گے جس کا مطلب ہے کہ وہ ممبئی کرکٹ اسوسی ایشن (ایم سی اے ) کے صدر نہیں بن سکیں گے۔ انہیں یہ کردار شرد پوار کے دھڑے کی حمایت سے ادا کرنا تھا۔آسام کے چیف منسٹرہمانتا بسوا سرما کے قریبی ساتھی دیوجیت سائکیا نئے جوائنٹ سکریٹری ہوں گے۔ وہ جیش جارج کی جگہ لیں گے۔بی سی سی آئی آئی سی سی کے چیئرمین کے عہدے کے لیے الیکشن لڑے گا یا نہیں اس کا ابھی فیصلہ نہیں ہوا ہے۔بی سی سی آئی کے ذرائع نے پی ٹی آئی کو بتایا مرکزی حکومت کے ایک بااثر وزیر نے بورڈ کے عہدیداروں کے انتخاب میں اہم کردار ادا کیا ہے۔ بنی 18 اکتوبر کو ممبئی میں ہونے والی بی سی سی آئی اے جی ایم میں باضابطہ طور پر عہدہ سنبھالیں گے۔ کسی بھی عہدے کے لیے انتخاب نہیں ہوگا کیونکہ تمام امیدواروں کا انتخاب متفقہ طور پر کیا گیا ہے۔بینی جوکہ ایک میڈیم فاسٹ بولررہے انہوں نے 1983 کے ورلڈ کپ میں ہندوستان کوچمپئن بنانے میں کلیدی کردار ادا کیا تھا۔ انہوں نے آٹھ میچوں میں 18 وکٹیں حاصل کیں جو اس ٹورنامنٹ کا ایک ریکارڈ تھا۔
