نئی دہلی :کانگریس کے سابق صدر راہول گاندھی نے جمعرات کو دہلی کے مکھرجی نگر علاقہ میں پہنچ کر یو پی ایس سی اور ایس ایس سی کی تیاری کرنے والے طلبا و طالبات سے ملاقات کی۔ راہول گاندھی سڑک کنارے ہی ان نوجوانوں کے ساتھ بیٹھ گئے۔ کافی دیر کی بات چیت میں طلبا نے راہول گاندھی کے ساتھ اپنے امتحان کی تیاری سے جڑے تجربات شیئر کیے۔ اس درمیان راہول گاندھی نے طلبا سے اور طلبا نے راہول گاندھی سے کئی سوال پوچھے۔ راہول گاندھی جب مکھرجی نگر پہنچے تو ان کے ساتھ پرینکا گاندھی کے بیٹے ریحان واڈرا بھی موجود تھے۔قابل ذکر ہے کہ راہول گاندھی کا اچانک لوگوں کے درمیان پہنچنا سرخیوں میں ہے۔ راہول گاندھی حال ہی میں کرناٹک اسمبلی انتخاب کی تشہیر کے بعد دہلی لوٹے ہیں۔ کرناٹک میں کانگریس پورے زور و شور سے انتخاب لڑ رہی ہے۔ پارٹی لیڈران کا دعویٰ ہے کہ وہ کرناٹک مین حکومت بنانے جا رہی ہے۔ کرناٹک میں راہول گاندھی نے سماجی انصاف کی بات کرتے ہوئے ذات پر مبنی مردم شماری کا مطالبہ کیا ہے۔واضح رہے کہ بھارت جوڑو یاترا کے بعد سے ہی راہول گاندھی کئی مواقع پر عام لوگوں، نوجوانوں، طلبا اور سماج کے دیگر طبقات کے ساتھ لگاتار رابطے میں ہیں۔ منگل کی شام کو ہی راہول گاندھی اچانک دہلی کے بنگالی مارکیٹ اور پرانی دہلی کے جامع مسجد علاقے میں پہنچے تھے۔ انھوں نے بنگالی مارکیٹ میں گول گپے کا لطف اٹھایا تھا اور جامع مسجد علاقہ میں تربوز کا شربت پیا تھا۔ ان سے ملاقات کے لیے لوگوں میں زبردست جوش دیکھنے کو ملا تھا۔آج انہوں نے مکرجی نگر میں طلبا کے ساتھ چائے کا لطف لیا۔
