بھوپال۔ 2 جون (یواین آئی) لوک سبھا میں قائد حزب اختلاف اور کانگریس کے سابق صدر راہول گاندھی کل اپنے مدھیہ پردیش کے دورے کے دوران دارالحکومت بھوپال میں پارٹی کا ‘سنگٹھن سرجن ابھیان’ کا آغاز کریں گے ۔ گجرات کے بعد اب پارٹی مدھیہ پردیش میں بھی یہ مہم شروع کرنے جا رہی ہے ۔ کانگریس نے اس مہم کے لیے ریاست میں مبصرین اور اضافی مبصرین کا تقرر کیا ہے ۔ یہ مہم کل سے شروع ہوگی۔ پارٹی کی اس مہم کے بارے میں کانگریس کے ریاستی صدر جیتو پٹواری نے نامہ نگاروں کو بتایا کہ پہلی بار، مدھیہ پردیش کانگریس نے تنظیم سازی کے لیے ایسا ایکشن پلان بنایا ہے ، جس کا افتتاح راہول گاندھی کریں گے ۔ انہوں نے کہا کہ اس اقدام کا مقصد یہ ہے کہ پنچایت سے لے کر ضلع کی سطح تک پارٹی کا تنظیمی نظام انصاف پر مبنی ہو۔ اس کے تحت تقریباً ملک بھر سے 61 مبصرین پورے مدھیہ پردیش میں تین ماہ تک رہیں گے اور گاؤں گاؤں کارکنوں کی میٹنگیں کریں گے ۔ ملک کا ہر شہری چاہتا ہے کہ پارٹی مضبوط ہو۔ یہ آنے والی سیاست کے لیے سنگ میل ثابت ہوگا۔ اسمبلی میں اپوزیشن لیڈر امنگ سنگھار نے سوشل میڈیا پلیٹ فارم ایکس پر لکھا، 3 جون 2025 کو جننائک راہول گاندھی جی کی بھوپال آمد مدھیہ پردیش کانگریس کے لیے ایک تاریخی موقع ہے ۔
غیر ضمانتی وارنٹ منسوخی کیلئے راہول گاندھی کی درخواست
رانچی۔ 2 جون (ایجنسیز) کانگریس لیڈر راہول گاندھی نے جھارکھنڈ ہائی کورٹ میں ایک عرضی دائر کی ہے جس میں جھارکھنڈ کے چائی باسا میں ایم پی۔ایم ایل اے کورٹ کی طرف سے ان کے خلاف جاری غیر ضمانتی وارنٹ کو منسوخ کرنے کا مطالبہ کیا گیا ہے۔ چائی باسا عدالت نے سال 2018 میں بھارتیہ جنتا پارٹی کے اس وقت کے صدر امیت شاہ کے خلاف مبینہ توہین آمیز ریمارکس سے متعلق ایک کیس میں 22 مئی کو راہول گاندھی کے خلاف وارنٹ جاری کیا اور انہیں 26 جون کو ذاتی طور پر عدالت میں حاضر ہونے کا حکم دیا۔ جب تک زیر التواء درخواست کی سماعت نہیں ہو جاتی تب تک چائی باسا عدالت کی طرف سے وارنٹ جاری کرنا نامناسب ہے۔ قابل ذکر ہے کہ چائباسا کے رہنے والے پرتاپ کٹیار نامی شخص نے 9 جولائی 2018 کو راہول گاندھی کے خلاف درج کرائی گئی شکایت میں الزام لگایا تھا کہ انہوں نے سال 2018 میں کانگریس اجلاس میں اس وقت کے بی جے پی کے قومی صدر امت شاہ کے خلاف توہین آمیز ریمارکس کیے تھے۔
شکایت کے مطابق راہول گاندھی نے کہا تھا کہ کانگریس میں کوئی قاتل قومی صدر نہیں بن سکتا۔ کانگریس والے کسی قاتل کو قومی صدر نہیں مان سکتے، یہ صرف بی جے پی میں ہی ممکن ہے۔ اس شکایت پر، چائباسا عدالت نے اپریل 2022 میں راہول گاندھی کے خلاف قابل ضمانت وارنٹ جاری کیا تھا، اس پر راہول گاندھی نے کوئی نوٹس نہیں لیا تھا۔ اس کے بعد عدالت نے فروری 2024 میں ان کے خلاف ناقابل ضمانت وارنٹ جاری کیا، راہول گاندھی کے وکیل نے عدالت میں درخواست دی تھی اور ذاتی طور پر حاضر ہونے سے استثنیٰ مانگا تھا، لیکن ان کی درخواست مسترد کر دی گئی تھی۔ اس کے خلاف راہول گاندھی نے جھارکھنڈ ہائی کورٹ سے رجوع کیا تھا، جہاں سے انہیں راحت ملی۔