دبئی ۔پاکستان ٹیم کے بیٹنگ مشیر میتھیو ہیڈن آج کل قرآن حکیم کا مطالعہ کر رہے ہیں اور مقدس کتاب کا انگریزی ترجمہ انہیں پاکستان کے وکٹ کیپر بیٹسمین محمد رضوان نے تحفے میں دیا ہے ۔آسٹریلیائی ادارے نیوز کاور کے مطابق ہیڈن کے ہوٹل کے کمرے کا دروازہ کھٹکھٹایا گیا اور ایک شخص کمرے میں قرآن مجید کے ساتھ داخل ہوا۔میتھیو ہیڈن نے انٹرویو کے دوران نیوزکاورسے کہا کہ وہ رضی (رضوان) تھا اور مجھے یہ کہنا پڑے گا کہ وہ ایک خوبصورت لمحہ تھا جو میں کبھی نہیں بھولوں گا۔ انہوں نے مزید کہا کہ میں ایک عیسائی ہوں لیکن اسلام کے لیے تجسس رکھتا ہوں، ایک پیغمبر عیسی مسیح کی پیروی کرتا ہے تو دوسرا پیغمبر اسلامﷺ کی عزت کرتاہوںاوردونوں(مذہب)ایک دوسرے سے مختلف ہیں لیکن انہوں نے مجھے قرآن حکیم کا انگریزی ترجمہ تحفتاً دیا۔ہم آدھے گھنٹے فرش پر بیٹھے اور اس پر بات کی۔ میں روز اسے تھوڑا تھوڑا پڑھ رہا ہوں۔ انہوں نے محمد رضوان کی تعریف کرتے ہوئے کہا کہ رضی میری پسندیدہ شخصیت ہے اور ایک چمپیئن ہیں۔میتھیو ہیڈن ٹی20 ورلڈ کپ سے کچھ ہفتے قبل پاکستان کے بیٹنگ مشیر مقررکیے گئے ہیں۔انہوں نے انٹرویو میں پاکستانی کپتان بابر اعظم کی بھی تعریف کی اور کہا کہ بابر ایک اچھا کھلاڑی ہے۔ گذشتہ رات وہ میرے پاس آئے اور کہا آپ کوکیا لگتا ہے میں کیسا جا رہا ہوں کوچ؟‘ ہیڈن نے مزید کہا کہ بابر اعظم کی کوچنگ کی جا سکتی ہے کیونکہ وہ کھلے ذہن کے مالک ہیں۔
