سید شجاعت اللہ حسینی بیابانی
رمضان شریف کے روزوں کا مقصد تقویٰ اختیار کرنا ہے۔رمضان المبارک اسلام کا نہایت مقدس مہینہ ہے جس میں اللہ تعالیٰ نے روزے فرض فرمائے۔ قرآنِ مجید واضح طور پر بیان کرتا ہے کہ روزوں کا بنیادی مقصد تقویٰ کا حصول ہے، نہ کہ محض بھوک و پیاس برداشت کرنا یا کسی سماجی رسم کی ادائیگی۔اللہ تعالیٰ ارشاد فرماتا ہے: يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ ۔ (البقرہ)ترجمہ: اے ایمان والو! تم پر روزے فرض کیے گئے ہیں جس طرح تم سے پہلے لوگوں پر فرض کئے گئے تھے تاکہ تم تقویٰ اختیار کرو۔اس آیت میں ” لَعَلَّكُمْ تَتَّقُوْنَ“روزے کے اصل مقصد کو واضح کر رہا ہے۔ تقویٰ کا مطلب ہے اللہ کا خوف دل میں رکھنا، اس کی نافرمانی سے بچنا اور ہر حال میں اس کی رضا کو مقدم رکھنا۔نبی کریم ﷺ نے بھی روزے کی روح کو واضح فرمایا۔ حدیث شریف میں ہے:جو شخص جھوٹ اور برے کاموں کو نہیں چھوڑتا تو اللہ کو اس کے بھوکا پیاسا رہنے کی کوئی حاجت نہیں۔ (صحیح بخاری)یہ حدیث واضح کرتی ہے کہ روزہ صرف ظاہری بھوک و پیاس کا نام نہیں بلکہ اخلاقی اصلاح اور باطنی پاکیزگی کا ذریعہ ہے۔ایک اور حدیث میں رسول اللہ ﷺ نے فرمایا:روزہ ڈھال ہے۔(صحیح بخاری، صحیح مسلم)یعنی روزہ انسان کو گناہوں اور جہنم سے بچانے والی ڈھال ہے۔ یہ حفاظت اسی وقت حاصل ہوتی ہے جب روزہ تقویٰ کے ساتھ رکھا جائے۔اگرچہ رمضان میں اجتماعی افطار، زکوٰۃ، صدقات اور ہمدردی جیسے سماجی پہلو بھی نمایاں ہوتے ہیں، لیکن یہ روزے کا اصل مقصد نہیں بلکہ تقویٰ کے نتیجے میں پیدا ہونے والے ثمرات ہیں۔ جب انسان بھوک و پیاس برداشت کرتا ہے تو اسے محتاجوں کا احساس ہوتا ہے، جس سے معاشرتی ہمدردی بڑھتی ہے۔ لیکن یہ اثرات ثانوی ہیں، بنیادی ہدف دل کی اصلاح اور اللہ سے تعلق کی مضبوطی ہے۔رمضان دراصل تزکیۂ نفس کا مہینہ ہے۔ قرآن کی تلاوت، قیام اللیل، دعا، استغفار اور صدقہ سب تقویٰ کی تکمیل کے ذرائع ہیں۔ روزہ انسان کے اندر صبر، ضبطِ نفس، اخلاص اور خوفِ خدا پیدا کرتا ہے۔لہٰذا ہمیں رمضان کو صرف سماجی سرگرمیوں تک محدود نہیں کرنا چاہیے بلکہ اس کے حقیقی مقصد یعنی تقویٰ کے حصول پر توجہ دینی چاہئے۔ اگر روزہ ہمیں گناہوں سے نہیں روکتا، زبان کو جھوٹ سے نہیں بچاتا اور دل کو پاک نہیں کرتا تو ہمیں اپنے روزے کا محاسبہ کرنا چاہئے۔ اللہ تعالیٰ ہمیں رمضان المبارک کی حقیقی روح کو سمجھنے اور تقویٰ اختیار کرنے کی توفیق عطا فرمائے۔آمین۔
