سڈنی۔ جنوبی افریقہ نے رائلی روسو(109) کی شاندار سنچری کے بعد انرک نارکھیا10 رنز دے کر چار وکٹوں اور تبریز شمسی 20 رنز پر تین وکٹیں کی خطرناک بولنگکی بدولت بنگلہ دیش کو رواں ورلڈکپ میں104 رنز سے شکست دے دی۔جنوبی افریقہ نے سوپر12 مرحلے کے میچ میں بنگلہ دیش کو کامیابی کے لیے206 رنزکا ہدف دیا ۔ اس کے جواب میں بنگلہ دیش کی ٹیم 16.3 اوورز میں101 رنز پرسمٹ گئی۔روسو نے کوئنٹن ڈی کاک(63) کے ساتھ 168 رنزکی زبردست شراکت داری کی جس کی بدولت جنوبی افریقہ ٹی ٹوئنٹی ورلڈ کپ2022 کا سب سے بڑا اسکورکرنے میں کامیاب رہی۔ نارکھیا نے جنوبی افریقہ کی جیت پر مہر لگاتے ہوئے صرف10 دے کر چار وکٹیں حاصل کیں ۔ اس کے علاوہ تبریز شمسی نے تین جبکہ کاگیسو ربادا اور کیشو مہاراج نے فی کس ایک وکٹ حاصل کی۔جنوبی افریقہ کا پہلا میچ بارش کی نذر ہونے کے بعد یہ زبردست کامیابی ان کے نیٹ رن ریٹ میں نمایاں اضافہ کرے گی۔جنوبی افریقہ نے ٹاس جیت کر بیٹنگ کرتے ہوئے کپتان ٹیمبا باوما کا وکٹ دورنوں پر گنوادیا۔اس کے بعد روسو اور ڈی کاک نے 168 رنز کی شراکت کی جو ٹی ٹوئنٹی ورلڈ کپ کی تاریخ کی سب سے بڑی شراکت داری ہے ۔ ڈی کاک نے آؤٹ ہونے سے قبل 38 گیندوں میں سات چوکوں اور تین چھکوں کی مدد سے 63 رنز بنائے ۔ دوسری جانب روسو نے اپنی سنچری مکمل کرتے ہوئے 56 گیندوں پر سات چوکوں اور آٹھ چھکوں کی مدد سے یہ اننگز کھیلی۔ یہ ٹی ٹوئنٹی ورلڈ کپ 2022 کی پہلی، جبکہ روسو کی ٹی ٹوئنٹی انٹرنیشنل میں لگاتار دوسری سنچری ہے ۔ اس سے قبل انہوں نے اندور میں ہندوستان کے خلاف کھیلے گئے ٹی ٹوئنٹی میچ میں بھی سنچری بنائی تھی۔
