بنگلورو: ہندوستانی کرکٹ ٹیم کے کپتان روہت شرما نے منگل کو یہاں کہا کہ فاسٹ بولر محمد سمیع ابھی پوری طرح فٹ نہیں ہیں اور ٹیم انہیں آسٹریلیا کے دورے پر لے جانے کا خطرہ مول نہیں لینا چاہتی۔ انہوں نے کہا کہ گھٹنوں میں سوجن کی وجہ سے انہیں ٹخنے کے آپریشن سے صحت یاب ہونے میں دشواری ہو رہی ہے۔سمیع نے ہندوستان کے لیے اپنا آخری میچ گزشتہ سال نومبر میں ونڈے ورلڈ کپ کے فائنل میں کھیلا تھا۔ روہت نے چہارشنبہ کو شروع ہونے والے نیوزی لینڈ کے خلاف پہلے ٹسٹ میچ کے موقع پر صحافیوں کو بتایا، ہمارے لیے ابھی ان کے بارے میں فیصلہ کرنا بہت مشکل ہے کہ آیا وہ موجودہ سیریز یا آسٹریلیا کے دورے کے لیے پوری طرح فٹ ہیں یا نہیں حال ہی میں ان کے گھٹنے میں سوجن تھی، جو کہ کافی غیر معمولی ہے۔ انہوں نے کہا وہ مکمل فٹنس دوبارہ حاصل کرنے کے عمل میں تھا اور صد فیصد فٹ ہونے کے قریب تھا لیکن ان کے گھٹنے میں سوجن ہوئی جس کی وجہ سے ان کی مکمل فٹنس دوبارہ حاصل کرنے کا عمل تاخیر کا شکار ہورہا ہے۔ انہیں نئے سرے سے آغاز کرنا تھا۔. ابھی وہ این سی اے (نیشنل کرکٹ اکیڈمی) میں ہے جہاں فزیو اور ڈاکٹر ان کی نگرانی کر رہے ہیں۔ روہت نے کہا کہ ٹیم انتظامیہ چاہتی ہے کہ سمیع عالمی کرکٹ میں واپس آنے سے پہلے مکمل فٹنس دوبارہ حاصل کر لیں۔ ہم اپنی پوری کوشش کر رہے ہیں اور ہم چاہتے ہیں کہ وہ صد فیصد فٹ رہے۔ ہم نصف فٹ سمیع کو آسٹریلیا نہیں لیجانا چاہتے۔ یہ ہمارے لئے صحیح فیصلہ نہیں ہوگا۔روہت نے کہا کہ نیشنل کرکٹ اکیڈمی میں ان کی صحت یابی کا مسلسل جائزہ لیا جائے گا اور انہیں قومی ٹیم میں واپسی سے قبل کچھ میچ کھیلنا ہوں گے۔ انہوں نے کہا کہ ہم انہیں صد فیصد فٹ ہونے کے لیے کافی وقت دینا چاہتے ہیں۔. فزیو، ٹرینرز، ڈاکٹروں نے انہیں مکمل طور پر فٹ کرنے کے لیے ایک طریقہ کار تجویزکیا ہے۔. انہیں بین الاقوامی کرکٹ کھیلنے سے پہلے کچھ (پریکٹس) میچ کھیلنا ہوں گے۔ سمیع نے ہندوستان کے لیے 64 ٹسٹ میچ کھیلے ہیں اور اس میں انہوں نے 27.71 کی اوسط سے 229 وکٹیں حاصل کی ہیں۔ہندوستان اور آسٹریلیا کے درمیان پانچ میچوں کی ٹسٹ سیریزکا پہلا میچ 22 نومبر کو پرتھ میں کھیلا جائے گا۔
