مودی اور شاہ دہلی سے جو کچھ کر رہے ہیں، اب ملک اس کو برداشت نہیں کرے گا:سابق مرکزی وزیر
کولکتہ :سابق مرکزی وزیر و بی جے پی قائد یشونت سنہا نے آج ترنمول کانگریس میں شمولیت اختیار کرلی ۔ترنمول کانگریس میں شمولیت کے بعد یشونت سنہا نے کہا کہ ’’جمہوریت کی طاقت جمہوری ادارے ہوتے ہیں، لیکن آج تقریباً ہر ادارہ کمزور ہو گیا ہے۔ اس میں ملک کی عدلیہ بھی شامل ہے۔‘‘مغربی بنگال کی سیاست میں آج ایک بار پھر اس وقت ہلچل پیدا ہوگئی جب سابق مرکزی وزیر اور بی جے پی سے ناراضگی کے سبب ناطہ توڑ چکے یشونت سنہا نے ترنمول کانگریس کا دامن تھام لیا۔ یشونت سنہا نے آج کولکاتا پہنچ کر نہ صرف ترنمول کانگریس کی رکنیت اختیار کی بلکہ بی جے پی کے خلاف کھل کر آواز بھی اٹھائی۔ ویسے تو یشونت سنہا کئی مواقع پر بی جے پی کو تنقید کا نشانہ بنا چکے ہیں، لیکن بنگال میں ممتا بنرجی کا ہاتھ تھام کر انھوں نے بی جے پی کو زبردست جھٹکا دیا ہے جو کہ ریاست میں پہلی مرتبہ برسراقتدار ہونے کا خواب شرمندہ تعبیر کرنے کیلئے ایزی چوٹی کا زور لگا رہی ہے۔ترنمول کانگریس میں شامل ہونے کے بعد بی جے پی پر شدید تنقید کرتے ہوئے یشونت سنہا نے کہا کہ ’’جمہوریت کی طاقت جمہوری ادارے ہوتے ہیں، لیکن آج تقریباً ہر ادارہ کمزور ہو گیا ہے۔ اس سے ہمارے ملک کے لیے سب سے بڑا خطرہ پیدا ہو گیا ہے۔‘‘ انھوں نے مزید کہا کہ ’’اٹل جی کے وقت میں بی جے پی اتفاق رائے پر یقین کرتی تھی، لیکن آج کی حکومت کچلنے اور جیتنے میں یقین کرتی ہے۔ اکالی دل، بی جے ڈی، شیوسینا پہلے ہی بی جے پی کا ساتھ چھوڑ چکی ہیں۔ آج بی جے پی کے ساتھ کون کھڑا ہے؟‘‘یشونت سنہا نے مزید کہا کہ ’’اس میں کوئی شک نہیں ہے کہ ترنمول کانگریس بہت بڑی اکثریت کے ساتھ اقتدار میں واپس آئے گی۔ بنگال سے پورے ملک میں ایک پیغام جانا چاہیے کہ جو کچھ مودی اور شاہ دہلی سے چلا رہے ہیں، اب ملک اس کو برداشت نہیں کرے گا۔ میں بہت افسوس کے ساتھ کہہ رہا ہوں کہ الیکشن کمیشن اب آزاد ادارہ نہیں رہا ہے۔ توڑ مروڑ کر الیکشن (8 مراحل میں ووٹنگ) کرانے کا فیصلہ مودی-شاہ کے کنٹرول میں لیا گیا ہے اور بی جے پی کو فائدہ پہنچانے کے خیال سے لیا گیا ہے۔‘‘اس درمیان لوک سبھا میں ترنمول کانگریس کے لیڈر سدیپ بندوپادھیائے نے کہا کہ ’’ہم اپنی پارٹی میں یشونت سنہا کا استقبال کرتے ہیں۔ ان کی حصہ داری سے انتخاب میں بی جے پی کے خلاف ہماری لڑائی مزید مضبوط ہوگی۔‘‘ واضح رہے کہ یشونت سنہا نے سال 1990 میں چندرشیکھر کی حکومت میں وزیر فینانس کی ذمہ داری نبھائی تھی اور اس کے بعد واجپئی کابینہ بھی انھیں اس وزارت کی ذمہ داری ملی۔ انھوں نے واجپئی حکومت میں وزیر خارجہ کی بھی ذمہ داری نبھائی۔