کراچی ۔5 اگسٹ (سیاست ڈاٹ کام ) پاکستانی کرکٹ ٹیم کے ہیڈ کوچ مکی آرتھر نے پی سی بی کو کپتانی کے حوالے سے تجویز پیش کرتے ہوئے کہا کہ سرفراز احمد کو کرکٹ ٹیم کے تینوں فارمیٹس کی کپتانی سے برطرف کیا جائے۔ ورلڈ کپ کے سیمی فائنل میں رسائی کی ناکامی اور پچھلے تین سال کی ٹیم کی ناقص کارکردگی کو مدِنظر رکھتے ہوئے پی سی بی نے ہیڈ کوچ، ٹیم انتظامیہ کو عہدے سے برطرف کرنے کے علاوہ کپتان سرفراز احمد سے بھی ٹیم کی قیادت واپس لینے کا فیصلہ کیا ہے۔ ذرائع کے مطابق مکی آرتھر نے مطالبہ کیا ہے کہ شاداب خان کو ونڈے اورٹی 20 کا کپتان بنایا جائے جبکہ بابر اعظم کو ٹسٹ ٹیم کی کپتانی دی جائے۔ مکی آرتھر نے سرفراز احمد کے بارے تنقیدی جملے بھی کہے ہیں۔ آرتھر نے پی سی بی کے مینجنگ ڈائریکٹر وسیم خان سے کہا ہے کہ مجھے مزید دو سال کا وقت دیا جائے ، تو میں ٹیم کو ایک بہتر مقام پر لے جائوں گا۔ میڈیا رپورٹس کے مطابق وسیم خان، چیئرمین پی سی بی احسان مانی کو ٹیم کے نئے انتظامیہ کا تقررات سے متعلق سفارشات بھیجنے سے قبل چہارشبنہ کو ٹیم ارکان کے ساتھ ایک اہم اجلاس کریں گے۔ واضح رہے کہ آرتھر 2016 سے پاکستان کرکٹ ٹیم کے ہیڈ کوچ ہیں اور انہوں نے انگلینڈ کے علاوہ سری لنکائی کرکٹ ٹیم کے کوچ بننے کے لیے درخواست داخل کردی ہے۔ واضح رہے کہ مکی آرتھر کی کوچنگ میں پاکستان کرکٹ ٹیم 2017 کی چمپیئنز ٹرافی جیتی جس کے بعد پاکستانی کرکٹ ٹیم ٹی 20 درجہ بندی میں دنیا کی نمبر ون ٹیم بنی ہے، لیکن ونڈے اور ٹسٹ کرکٹ میں پاکستان ٹیم کی کارکردگی ناقص رہی ہے جبکہآرتھر کا کھلاڑیوں کے ساتھ رویہ بھی ٹھیک نہیں ہے۔ دوسری جانب آرتھر اور دوسرے عملہ کے ارکان سے کیے گئے معاہدے 15 اگست کو ختم ہوجائیں گے۔
