دوحہ : سعودی وزیر خارجہ شہزادہ فیصل بن فرحان نے ہفتہ کو قطر میں شام کے حوالے سے ایک اعلی سطح کے اجلاس میں شرکت کی جس میں علاقائی اور بین الاقوامی سٹیک ہولڈرز شامل تھے۔ میڈیا کے مطابق 22 ویں دوحہ فورم کے اجلاس کے موقع ان کی شرکت اہمیت کی حامل رہی۔ اردن، عراق، قطر اور مصر کے وزرائے خارجہ کے علاوہ آستانہ امن عمل کے ممالک ترکیہ، روس اور ایران کے نمائندوں نے بھی اجلاس میں شرکت کی۔ اجلاس میں شام کیلئے اقوام متحدہ کے خصوصی ایلچی گیئر پیٹرسن بھی موجود تھے جنہوں نے شام میں جاری بحران سے نمٹنے کیلئے بین الاقوامی کوششوں پر زور دیا۔اجلاس میں شام کی حالیہ صورتحال پر تبادلہ خیال کیا گیا جس میں ڈائیلاگ کے فروغ اور علاقائی چیلنجوں کا حل تلاش کرنے پر زور دیا گیا۔ قطر میں سعودی سفیر شہزادہ منصور بن خالد بن فرحان اور وزیر خارجہ کے دفتر کے ڈائریکٹر جنرل عبدالرحمن الداود بھی موجود تھے۔قطری وزارت خارجہ کے بیان میں کہا گیا کہ اجلاس نے شام کے بحران کا موثر سیاسی حل تلاش کرنے کیلیے قریبی مشاورت اور کو آرڈینشن پر زور دیا۔یہ اس طرح ہونا چاہیے جس سے سکیورٹی، استحکام اور انصاف کے لیے شامی عوام کی امنگوں کو پورا کیا جاسکے۔ علاوہ ازیں خطے میں سکیورٹی اور استحکام کی کوششوں کو بڑھایا جائے۔
