نئی دہلی :بی جے پی کے متنازعہ ترجمان سمبت پاتراکی مشکلات میں اضافہ ہوگیا ہے۔ اطلاعات کے مطابق دہلی کی ایک عدالت نے سمبت پاترا کی نظرثانی کی درخواست کو خارج کر دیا، بی جے پی قائد نے مجسٹریٹ عدالت کے ان الزامات کے جواب میں ایف آئی آر درج کرنے کے حکم کو چیلنج کیا تھا جس میں انہوں نے دہلی کے چیف منسٹر کیجریوال کی چھیڑ چھاڑ کی گئی ویڈیو پوسٹ کی تھی۔سیشن کورٹ نے پاترا کی درخواست کو خارج کرتے ہوئے پولیس کو ہدایت دی کہ وہ بی جے پی ترجمان کو ملزم بنائے بغیر تحقیقات کرے۔ عدالت نے پولیس رپورٹ کا حوالہ دیا، جس میں پاترا کو معصوم بتایا گیا تھا۔ رپورٹ میں کہا گیا تھا کہ پاترا نے غیر دانستہ طور پر فرضی ویڈیو سوشل میڈیا پلیٹ فارم پر اپ لوڈ کی تھی تاہم وہ اس کے خالق نہیں تھے۔قبل ازیں عام آدمی پارٹی کی رکن اسمبلی آتشی کی طرف سے کی گئی شکایت کی بنیاد پر پاترا کے خلاف ایف آئی آر درج کرنے کی عدالت نے ہدایت کی تھی۔
