نئی دہلی: صدر کانگریس ملکارجن کھرگے اور پارٹی لیڈر سونیا گاندھی رام للا کے پران پرتشٹھا کی تقریب میں شرکت نہیں کریں گے۔ کانگریس لیڈر اور لوک سبھا اپوزیشن لیڈر ادھیر رنجن چودھری بھی اس تقریب میں شرکت نہیں کریں گے۔ کانگریس نے اس تقریب کو بی جے پی اور آر ایس ایس کی تقریب قرار دیا ہے۔ شری رام جنم بھومی تیرتھ ٹرسٹ کی طرف سے کئی اپوزیشن قائدین کو دعوت نامے بھیجے گئے تھے۔ اس سے قبل، سی پی ایم اور شیو سینا (یو بی ٹی) پارٹی پہلے ہی اس تقریب سے دوری اختیار کرچکی ہیں۔ گزشتہ ماہ کانگریس صدر اور راجیہ سبھا میں اپوزیشن لیڈر ملکارجن کھرگے، کانگریس پارلیمانی پارٹی کی صدر سونیا گاندھی اور لوک سبھا میں کانگریس پارٹی کے لیڈر ادھیر رنجن چودھری کو رام مندر کی افتتاحی تقریب کیلئے دعوت نامے موصول ہوئے تھے۔کانگریس کے جنرل سکریٹری مواصلات جے رام رمیش نے ایک بیان میں کہا ہے کہ ہمارے ملک میں لاکھوں لوگ بھگوان رام کی پوجا کرتے ہیں۔ مذہب ذاتی معاملہ ہے۔ لیکن آر ایس ایس اور بی جے پی نے ایودھیا میں مندر کو ایک طویل عرصے سے سیاسی پروجیکٹ بنا رکھا ہے۔ بی جے پی اور آر ایس ایس کے لیڈر انتخابی فائدے کیلئے نامکمل مندر کا افتتاح کر رہے ہیں۔
