نئی دہلی: سونیا گاندھی رام مندر کی تقریب میں حصہ لے سکتی ہیں۔ وہ 22 جنوری کو ایودھیا میں ہونے والے پروگرام میں حصہ لینے والی ہیں۔ اس پروگرام میں شرکت کیلئے کانگریس صدر ملکارجن کھرگے سمیت کئی کانگریس لیڈروں کو دعوت نامے بھیجے گئے ہیں۔ تاہم ابھی تک سرکاری طور پر اس بات کی تصدیق نہیں ہوسکی ہیکہ رام مندر میں منعقد ہونے والے پروگرام میں کانگریس کے کون کون سے رہنما شرکت کریں گے۔ آئندہ لوک سبھا انتخابات کے پیش نظر کانگریس نے ایسا فیصلہ کیا ہے۔ جمعرات کو کانگریس نے اس بارے میں اپنا موقف واضح نہیں کیا تھا کہ آیا 22 جنوری کو ایودھیا میں رام مندر کے تقدس کی تقریب میں پارٹی کے اعلیٰ رہنما شرکت کریں گے یا نہیں، تاہم پارٹی نے کہا کہ وہ اس دعوت کیلئے شکر گزار ہے۔کانگریس صدر ملکارجن کھرگے، پارٹی کی سابق سربراہ سونیا گاندھی اور لوک سبھا میں پارٹی لیڈر ادھیر رنجن چودھری کو 22 جنوری کو رام مندر کی تقریب میں مدعو کیا گیا ہے۔
ذرائع نے بتایا کہ شری رام جنم بھومی ٹرسٹ نے انہیں ایک دعوت نامہ بھیجا ہے۔ کانگریس کے جنرل سکریٹری کے سی وینوگوپال سے پریس کانفرنس میں پوچھا گیا کہ کیا پارٹی لیڈر اس تقریب میں شرکت کریں گے، جس پر انہوں نے کہا کہ آپ کو پارٹی کا موقف معلوم ہوگا۔ آپ کو شرکت کے بارے میں 22 جنوری کو معلوم ہو جائے گا۔
