پالکڈ : وزیر اعظم نریندر مودی نے منگل کے روز کیرالا کی مارکسی کمیونسٹ پارٹی (سی پی آئی۔ایم) کی زیرقیادت لیفٹ ڈیموکریٹک فرنٹ(ایل ڈی ایف) کی حکومت پر ’ سونے کے کچھ ٹکڑوں ‘کے لئے ریاست کے لوگوں کو دھوکہ دینے کا الزام عائد کیا ۔ مودی نے یہاں اپنے پہلی انتخابی ریلی سے خطاب کرتے ہوئے کہا ’’ا یل ڈی ایف کے بارے میں کہا جاسکتا ہے کہ جیسے دھو کہ بازوں نے عیسیٰ مسیح کو دھوکہ د یا تھا ، ویسے ہی ایل ڈی ایف نے سونے کے چند ٹکڑوں کے لئے کیرالا کے لوگوں کو دھوکہ دیا ہے‘‘ ۔ مودی کا یہ تبصرہ واضح طور پر 2020 کے کیرالا کے سونے کی اسمگلنگ کے کیس کے تناظر میں ہے ۔ انہوں نے کہا کہ گزشتہ چند برسوں میں کیرالا کی سیاست میں بڑی تبدیلی دیکھی جارہی ہے ۔ وزیر اعظم نے کہا کہ پہلی بار ووٹ ڈالنے والے نوجوان ایل ڈی ایف اور اپوزیشن یونائیٹیڈ ڈیموکریٹک فرنٹ (یو ڈی ایف) دونوں سے ناراض ہیں ۔ انہوں نے کہا کہ گذشتہ کئی برسوں سے یو ڈی ایف اور ایل ڈی ایف کی دوستانہ مسابقت کی سیاست جاری ہے ۔ انہوں نے کہا ’’ مختلف نام ایک جیسے ہی کام کر رہے ہیں۔ ان کا مقصد دولت کمانا ہے‘‘۔ ریاست کی 140 رکنی اسمبلی کے انتخابات کے لئے 6 اپریل کو ووٹ ڈالے جائیں گے ۔ ووٹوں کی گنتی 2 مئی کو ہوگی۔بی جے پی نے گزشتہ برس سبری مالا مندر میں تمام عمر کی خواتین کے داخلہ کے مسئلہ پر کیرالا میں خوب سیاست کی۔ بی جے پی لیڈر امیت شاہ نے یہاں تک کہہ دیا تھا کہ آئندہ اسمبلی چناؤ میں بی جے پی حکومت قائم ہوگی۔
