ناگپور: مہاراشٹر کے ضلع وردھا میں ایک سڑک حادثے میں بھارتیہ جنتا پارٹی (بی جے پی) کے ایم ایل اے کے بیٹے سمیت میڈیکل کے سات اسٹوڈنٹس کی موت ہو گئی۔وردھا کے پولیس سپرنٹنڈنٹ پرشانت ہولکر نے بتایا کہ حادثہ پیر کی رات تقریباً 11.30 بجے اس وقت پیش آیا جب اسٹوڈنٹس کی گاڑی دیولی کے سیلسورا سے گزر رہی تھی،اچانک ان کی گاڑی کے سامنے ایک جنگلی جانور آ گیا، ڈرائیور گاڑی پر سے کنٹرول کھو بیٹھا اور کار بے قابو ہو گئی۔مسٹر ہولکر نے بتایا کہ کار پل سے گر گئی جس سے ساتوں اسٹوڈنٹس کی موقع پر ہی موت ہو گئی۔ مرنے والوں کی شناخت نیرج چوہان، نتیش سنگھ، وویک نندن، پرتیوش سنگھ، شبھم جیسوال، پون شکتی اور تروڑا کے ایم ایل اے وجے رہانگڈلے کے بیٹے اویشکر کے طور پر کی گئی ہے ۔تمام طلبا ساؤنگی میڈیکل کالج کے اسٹوڈٹنس تھے اور ان میں سے چھ دیگر ریاستوں سے تعلق رکھتے تھے ۔مرکزی حکومت نے متاثرین کے لواحقین کو دو دو لاکھ روپے کی امداد کا اعلان کیا ہے ۔
