مرکزی قانون سازی جمہوریت کے مغائر، عوام میں مذہبی بنیاد پر پھوٹ کا شاخسانہ : یشونت سنہا
لکھنؤ27 جنوری(سیاست ڈاٹ کام ) بھارتیہ جنتا پارٹی سے بغاوت کرنے والے و سابق مرکزی وزیر یشونت سنہا نے پیر کو کہا کہ مرکزی حکومت کی جانب سے شہریت(ترمیمی)قانون(سی اے اے )اور این آر سی کے بارے میں لئے گئے غلط فیصلوں سے پیداہونے والے عوامی اشتعال سے پورے عالم میں ہندوستان کی شبیہ کو نقصان پہنچا ہے ۔مسٹر سنہا نے یہاں سماج وادی پارٹی(ایس پی) کے دفتر پر صحافیوں سے بات چیت میں کہا کہ سی اے اے کے حوالے سے پورے ملک میں ہورہے احتجاجی مظاہروں سے پوری دنیا میں ہندوستان کی شبیہ کو نقصان پہنچا ہے جس کے لئے سیدھے طور پر مرکزی اور اترپردیش کی بی جے پی سرکاریں ذمہ دار ہیں۔انہوں نے کہا کہ سی اے اے اور این آر سی کے اعلان سے پورے ملک میں خوف کا ماحول ہے ۔ لوگ خاص طور سے اقلیتی طبقہ ڈرا ہوا ہے ۔ اور اس کے خلاف تحریک چلا رہے ہیں حکومت کی ذمہ داری ہے کہ وہ عوام کو اس خوف کے ماحول سے باہر نکالے ۔ان سے بات کرے اور ان کے شہبات کا ازالہ کرے جس سے ملک میں امن وامان قائم رہ سکے ۔ سنہا نے کہا کہ نریندرمودی حکومت ایک جابر حکومت ہے ۔ اس کے اشارے پر اترپردیش سمیت بی جے پی کے حکمرانی والی ریاستوں میں سی اے اے اور این آر سی کے ضمن میں حالات سب سے خوف ناک ہیں۔ پر امن احتجاج کرنے والی عوام کی آواز کو دبایا جارہا ہے ۔ ملک کے معاشی حالات کی فکر کرنے کے بجائے حکومت سی اے اے اور این آر سی کے ذریعہ عوام کا دھیان بھٹکانے کا کام کررہی ہے ۔سابق مرکزی وزیر نے کہا کہ مرکزی وزیر داخلہ مسٹر شاہ اور مسٹر یوگی آدتیہ ناتھ کی زبان ان کو زیب نہیں دیتی ہے ۔ مسٹر شاہ کہتے ہیں کہ حکومت سی اے اے واپس نہیں لے گی اور این آر سی سے ایک انچ بھی پیچھے نہیں ہٹے گی۔ان کی یہ زبان ٹھیک نہیں ہے ۔ اعلی عہدے والے وزراء کی طرز تکلم کی وجہ سے بھی ملک میں بدامنی کا ماحول ہے ۔انہوں نے کہا کہ شہریت(ترمیمی)قانون دراصل ملک کے آئین کے خلاف ہی نہیں بلکہ ملک کے بنیادی ڈھانچے کے خلاف بھی ہے ۔ حکومت کے پاس شہریت دینے کے لئے پہلے سے ہی اتنے اختیارات ہیں کہ اس قانون کی ضرورت ہی نہیں ہے ۔ اس موقع پر سماج وادی پارٹی(ایس پی)سربراہ اکھلیش یادو بھی موجود تھے ۔قابل ذکر ہے کہ ‘‘گاندھی شانتی یاترا’’ پر نکلے سنہا نے اتوار کو اٹاوہ کے سیفئی میں ایس پی سربراہ اکھلیش یادو سے ملاقات کی تھی بعد اذاں ان کی یاترا نے لکھنؤ کے لئے کوچ کیا تھا۔یاترا کا اختتام 30 جنوری کو دہلی میں ہوگا۔