شہریت ترمیمی قانون ہر قیمت پر لاگو ہوگا: بی جے پی لیڈر جی کشن ریڈی

,

   

حیدرآباد: چاہے کچھ بھی ہوجائے، کتنے ہی احتجاج کیوں نہ کرلئے جائیں مودی حکومت کی جانب سے لایا گیا شہریت قانون ہر قیمت پر لاگو ہوکر رہے گا۔ ان خیالات کا اظہار مرکزی مملکتی وزیر و سکندرآباد رکن پارلیمنٹ جی کشن ریڈی نے کیا۔ کشن ریڈی یہاں سی اے اے کی حمایت میں منعقدہ اجلاس سے خطاب کررہے تھے۔

سی اے اے کی مخالفت کرنے پر انہوں نے کانگریس وزراء پر تنقید کی اور کہا کہ وہ سیاسی طور پر نریندر مودی کا مقابلہ نہیں کرسکتے۔ انہوں نے اس بات کو مسترد کردیا کہ اس نئے قانون کی وجہ مذہب کی بنیاد پر تفریق کی جارہی ہے اور ایسی باتوں افواہ قرار دیا۔ انہوں نے اپوزیشن پارٹیوں پر الزام عائد کیا کہ ملک میں ہورہے تشدد کے واقعات میں اپوزیشن پارٹیاں ملوث ہیں جو لاء اینڈ آر ڈر میں خلل ڈال رہے ہیں۔

مرکزی وزیر کشن ریڈی نے دعوی کیا کہ اس نئے قانون کے ذریعہ سے کسی کی بھی شہریت چھینی نہیں جارہی ہے لیکن پاکستان، بنگلہ دیش اور افغانستان میں ہندوؤں کو شہریت دی جارہی ہے۔ انہوں نے دعوی کیا کہ ان ممالک میں ہندوؤں کو پریشان کیا جارہا ہے۔ انہوں نے کہا کہ اس قانون کے ذریعہ مظلوم ہندوؤں کی مدد کی جائے گی۔ انہوں نے کہا کہ کانگریس، ٹی آر ایس اور مجلس اتحادالمسلمین اپنے پارٹی کے لوگوں کو اس قانون کے خلاف احتجاج کرنے کے لئے روانہ کررہے ہیں۔