سکندر حیات گڑبڑؔ
تمنا …!!
میں ہر روز پٹوں عشق میں مجنوں کی طرح
اور تڑپتی ہے میرے پیار میں لیلی میری
اس کے ابا کو تو دنیا سے اُٹھا لے یارب!
لب پہ آتی ہے دعا بن کے تمنا میری
…………………………
نیازؔ سواتی
مٹھائی… !!
مٹھائی اگر تجھ کو پیاری نہ ہوتی
تیری توند پھر اتنی بھاری نہ ہوتی
نہ ہوتا اگر کام درپیش تم سے
تو یوں روز تیمارداری نہ ہوتی
اگر ٹیم میں اک بھی ہوتا کھلاڑی
تو ٹیم اپنی ہر بار ہاری نہ ہوتی
قطر سے نہ لاتے اگر مال و دولت
محلے میں عزت ہماری نہ ہوتی
اگر چھوڑ کر وہ نہ مرتا وراثت
پس مرگ یوں آہ و زاری نہ ہوتی
اگر گرم کرتے نہ بابو کی مٹھی
تو آسان مشکل تمھاری نہ ہوتی
…………………………
…خبر پہ شوشہ …
خلوت کے نظارے جلوت میں
٭ سوشیل میڈیا پر ایک تصویر وائرل ہوئی۔ جس میں دیکھا جاسکتا ہے کہ عشق کی بدہضمی کا شکار ایک لڑکا، لڑکی چلتے آٹو میں حیدرآباد کی ایک مصروف ترین سڑک پر آٹو رکشا کے ڈرائیور سیٹ پر یکجا بیٹھے رومانس فرما رہے ہیں۔ جلوت میں پیش اس خلوت کے منظر کو کسی راہگیر نے موبائیل میں قید کرکے وائرل کردیا۔ اس سے آگے کیا ہوا کسی نیوز پورٹل نے اب تک شائع نہیں کیا۔ مگر یہ منظر دیکھ کربرسوں قبل ساحر لدھیانوی کا کہا ایک شعر ذہن میں آیا۔ آپ بھی سنئے:
کچھ بھی نہ رہا جب بکنے کو
جسموں کی تجارت ہونے لگی
خلوت میں بھی جو ممنوع تھی
وہ جلوت میں جسارت ہونے لگی
کے این واصف۔ ریاض
…………………………
غلطی سے …!!
٭ شاہی محل میں شہر کے معزز ذی حیثیت ہستیاں ، شاہی مہمان پارٹی میں شریک تھے۔ معزز خواتین کی نظریں رانی صاحبہ کے گلے میں جگمگاتی انتہائی قیمتی ہار پر تھیں۔ رانی صاحبہ نے مسکراتے ہوئے اپنے گلے سے قیمتی ہار نکال کر مہمانوں کو بتارہی تھیں۔ ہار ایک ہاتھ سے دوسرے ہاتھ پہنچتے پہنچتے اچانک غائب ہوگیا۔ بڑی پشیمانی کی بات تھی ۔ انتظامیہ سے کسی نے اعلان کیاکہ ہوسکتا ہے غلطی سے یہ ہار کسی کے پاس رہ گیا ہو ۔ ٹیبل پر یہ سونے کا کٹورہ رکھا جارہا ہے اور دو منٹ کیلئے لائٹ بند کردی جائے گی جس کسی کے پاس یہ ہار ہو وہ اس کٹورے میں ڈال دیں تاکہ اندھیرے میں وہ پشیمانی سے بچ جائیں اور کسی کو پتہ نہ چلے ۔ دو منٹ کے بعد لائٹ کھولی گئی ، کیا دیکھتے ہیں کہ سونے کا کٹورہ بھی غائب ہوچکا ہے …!!
محمد عبدالرزاق ۔ آصف نگر
…………………………
ضرورت نہیں …!!
کام والی بائی : باجی ! آپ کے یہاں کھانے کے جھوٹے برتن ، کچن اور سارے گھر کی صاف صفائی کیلئے کوئی کام والی بائی کی ضرورت ہے …!؟
بیوی نے مسکراتے ہوئے اپنے شوہر کی طرف دیکھا اور کہا ! ہمارے یہاں ان کے ہوتے ہوئے اور کسی کام کرنے والی بائی کی ضرورت نہیں ہے …!!
سالم جابری ۔ آرمور
…………………………
مجھے نیند نہ آئے …!!
مریض : مجھے رات کو نیند نہیں آتی …!
ڈاکٹر : لیٹ کر 2 ہزار تک گنتی گنا کرو نیند آجائے گی ۔
اگلے روز وہ مریض ڈاکٹر کے پاس دوبارہ آیا تو ڈاکٹر نے پوچھا کہ میرے مشورہ پر عمل کرنے سے تمہاری نیند کا مسئلہ حل ہوا …!
مریض : ڈاکٹر صاحب آپ کے مشورہ پر عمل کرنا بہت مشکل کام ہے ! میں گنتی کرتے ہوئے ایک ہزار تک پہنچا تو نیند آنے لگی ، پھر چائے پی اور 2 ہزار پورے کئے …!!
اختر عبدالجلیل ناز ۔ محبوب نگر
…………………………
