احمد علوی
سبق …!!
سبق شادی شدہ لوگوں سے لیجئے
محبت میں پریشانی سے بچئے
مزے سے عشق کیجے بیس پچیس
مگر شادی کی نادانی سے بچئے
…………………………
فرید سحرؔ
ایسا کیوں ہوتا ہے …!!
ایسا کیوں ہوتا ہے اکثر یہ خیال آتا ہے
ساس دیکھے جو بہو کو تو جلال آتا ہے
آکے سُسرال میں کرتا ہے چکن کی خواہش
خود کے گھر سے تو مگر کھاکے وہ دال آتا ہے
چین سے بیٹھنے دیتی نہیں محفل میں مجھے
گھنٹے گھنٹے سے مجھے بیوی کا کال آتا ہے
خودکشی کرنے کی سالے کو اگر دوں دھمکی
کھودنے قبر مری لے کے کُدال آتا ہے
سر پہ بیٹے کو خوشی سے میں اُٹھا لیتا ہوں
اپنے سُسرال سے جب لیکے وہ مال آتا ہے
کر کے احسان جو سائل کو بہت جتلائے
گویا نیکی کو سمندر میں وہ ڈال آتا ہے
ناز کرنا نہ کبھی عارضی شہرت پہ میاں
ہو طُرم خاں بھی اگر اُس کو زوال آتا ہے
دُھول آنکھوں میں بہت جھونک کے بنتے ہیں امیر
اپنے نیتاؤں کو بس اتنا کمال آتا ہے
بڑھ گئی سونے کی قیمت تو اُچھلتے کیوں ہو
اب تو کچرے کی بھی قیمت میں اُچھال آتا ہے
اپنی گھر والی کی ہر بات پہ کرتا ہے عمل
بات کو ماں کی مگر اپنی وہ ٹال آتا ہے
جان جاتے ہیں سبھی داد سے محروم رہا
جب بھی محفل سے سحرؔ ہوکے نڈھال آتاہے
…………………………
غلطی سے …!!
پہلا دوست (دوسرے دوست سے ) : کل میرے گھر میں آدھی رات کو چور گُھس آیا تھا اور میری بیوی یہ سمجھی کہ میں گھر آیا ہوں !
دوسرا دوست : پھر کیا ہوا …!؟
پہلا : چور شدید زخمی حالت میں دواخانہ میں پڑا ہے …!!
مظہر قادری ۔ حیدرآباد
…………………………
میں دھکا لگا دوں …!!
٭ ایک آدمی کافی دیر سے کھڑے کھڑے چابی سے اپنا کان کھجا رہا تھا۔
ایک پاگل اِسے غور سے دیکھتے ہوئے بولا: ’’بھائی صاحب، آپ اسٹارٹ نہیں ہو رہے تو میں دھکا لگا دوں؟‘‘
ابن القمرین ۔ مکتھل
…………………………
مہربانی …!!
گاہک (دودھ والے سے ) : تمہاری بھینس کتنا دودھ دیتی ہے …!؟
دودھ والا : روزآنہ 5 سیر …!
گاہک : پھر تم دس (10) سیر دودھ کیسے بیچتے ہو …!؟دودھ والا : یہ سب تو پاس والے کنویں کی مہربانی ہے …!!
خورشید جہاں بیگم ۔ عادل آباد
…………………………
کوئی بھی آمین نا کہے …!!
٭ مسجد میں ایک شخص دعا کررہا تھا: ’’یارب ! میرے کاروبار میں برکت دے‘‘۔
بازو بیٹھے شخص نے آواز لگائی:’’کوئی بھی آمین نا کہے ورنہ سب کے سب مر جائیں گے …! یہ شخص کفن بیچتا ہے… !!
محمد شبیر احمد ۔ ترپ بازار
…………………………
معاف کیجئے …!!
٭ ایک صاحب ڈاک خانہ گئے اور پوسٹ ماسٹر سے کہنے لگے : ’’میری بیوی گم ہوگئی ہے میری مدد کریں …!!‘‘۔
پوسٹ ماسٹر (غصے میں ) : اندھے ! پولیس اسٹیشن جاؤ یہ ڈاک خانہ ہے …!!
صاحب نے معصومیت سے کہا : ’’معاف کیجئے گا …! خوشی میں سمجھ نہیں آرہا تھا کہ کہاں جاؤں …!!
اختر عبدالجلیل نازؔ ۔ محبوب نگر
…………………………
دو سال پہلے !!
جج نے ملزم سے پوچھا : ’’تم نے اس شخص کے منہ پر مکا کیوں مارا ؟‘‘۔
ملزم نے کہا : ’’جناب ! اس نے آج سے دو سال پہلے مجھے گینڈا کہا تھا ‘‘
جج نے کہا : ’’دو سال پہلے کہا تھا اور تم نے مکا آج مارا ؟ ‘‘ملزم نے کہا ’’جناب ! میں نے آج ہی گینڈا دیکھا ہے ‘‘۔
محمد فاروق ۔ ابراہیم پٹن
…………………………
