نئی دہلی: عام آدمی پارٹی کی شیلی اوبرائے دہلی کی میئر اور آل محمد اقبال کو ڈپٹی میئر کے عہدے پر پھر سے منتخب کرلیا گیا ہے۔ وزیر اعلی اروند کجریوال نے ڈاکٹر شیلی اوبرائے کو دوبارہ دہلی میونسپل کارپوریشن کا میئر بننے پر مبارکباد دی۔ انہوں نے ٹویٹ کیا کہ شیلی اور آل محمد اقبال کو اس بار بلا مقابلہ میئر اور ڈپٹی میئر بننے پر مبارکباد۔ دونوں کیلئے نیک خواہشات۔ عوام کو ہم سے بہت امیدیں ہیں۔ آپ دونوں ان کی توقعات پر پورا اترنے کیلئے سخت محنت کریں۔میئر کے عہدے کیلئے عام آدمی پارٹی کی طرف سے امیدوار شیلی اوبرائے بی جے پی امیدوار شیکھا رائے کے نام واپس لینے کے بعد دوبارہ دہلی میونسپل کارپوریشن کی میئر منتخب ہوگئیں۔ اس کے علاوہ ڈپٹی میئر کے عہدے کیلئے بی جے پی امیدوار سونی پانڈے کی نامزدگی واپس لینے کے بعد عام آدمی پارٹی کے آل محمد اقبال ڈپٹی میئر کیلئے بلا مقابلہ منتخب ہو گئے ہیں۔
شیلی اوبرائے نے میئر کا انتخاب جیتنے کے بعد وزیر اعلی اروند کجریوال کا شکریہ ادا کیا ۔ انہوں نے کہا کہ ہم سب کو سیاست سے اوپر اٹھ کر مل کر کام کرنا ہوگا تاکہ دہلی کے لوگوں کیلئے اسکولوں، اسپتالوں، سڑکوں اور پارکوں کا کام پوری لگن کے ساتھ کیا جاسکے ۔
