دہلی۔17؍مئی (ایجنسیز ) عام آدمی پارٹی کے 15کونسلروں نے استعفیٰ کا اعلان کرتے ہوئے عآپ کی اعلیٰ قیادت پر میونسپل کارپوریشن ٹھیک سے نہ چلا پانے کا الزام عائد کیا ہے۔ کونسلروں نے نئی پارٹی سے متعلق اعلان کرتے ہوئے کہا کہ ان کی پارٹی کا نام ’اندر پرستھ وکاس پارٹی‘ ہوگا اور مکیش گویل اس پارٹی کے قائد ہوں گے۔کونسلروں کا کہنا ہے کہ ہم سبھی کارپوریشن کونسلر دہلی میونسپل کارپوریشن میں 2022 میں عآپ کی ٹکٹ سے منتخب ہوئے تھے، لیکن 2022 میں دہلی میونسپل کارپوریشن میں برسراقتدار ہونے کے باوجود پارٹی کی اعلیٰ قیادت دہلی میونسپل کارپوریشن کو مناسب طریقے سے چلانے میں ناکام رہی۔ اعلیٰ قیادت کا کونسلروں سے آپس میں ربط نہیں کے برابر رہا، جس کی وجہ سے پارٹی اپوزیشن میں پہنچ گئی۔ کونسلرز نے یہ بھی کہا کہ ہم کارپوریشن کونسلر آج 17 مئی کو اپنی ایک پارٹی بنا رہے ہیں، جس کا نام ’اندرپرستھ وکاس پارٹی‘ ہوگا ۔
اور اس کے ذریعہ لیے گئے فیصلوں پر مکمل اتفاق ظاہر کرتے ہیں۔ جن 15 عآپ کونسلروں نے پارٹی کی ابتدائی رکنیت سے استعفیٰ دیا ہے ان میں مکیش گویل، ہیم چند گویل، دنیش بھاردواج، ہمانی جین، اوشا شرما، صاحب کمار، راکھی کمار، اشوک پانڈے، راجیش کمار، انل رانا، دیویندر کمار، روناکشی شرما اور منیشا شامل ہیں۔ ایک میڈیا رپورٹ کے مطابق مکیش گویل نے دعویٰ کیا ہے کہ نئی پارٹی کو 15 کونسلر کی حمایت حاصل ہے۔