بغداد : عراق میں ناٹو اتحاد کے کمانڈر جنرل پیئر اولسن نے باور کرایا ہے کہ عراقی سرزمین پر ناٹو فورسز کا وجود بغداد حکومت کی دعوت کی بنا پر ہے۔جمعرات کے روز العربیہ کو دیے گئے بیان میں انہوں نے کہا کہ “ناٹو فورسز ملک میں امن و امان قائم کرنے کے واسطے عراقی حکومت کے ساتھ کام کر رہی ہیں۔ عراقی حکام کی جانب سے سرکاری درخواست کے بغیر ان فورسز کے مشن میں توسیع نہیں کی جا سکتی”۔جنرل اولسن نے یہ بھی واضح کیا کہ عراق میں ناٹو مشن کی ذمہ داریاں لڑائی میں شریک ہونا نہیں ان کا کام عراقی وزارت دفاع کو سیکورٹی اور ملٹری مشاورت پیش کرنا ہے۔ ناٹو کمانڈر کے مطابق ان کی فورسز “داعش اور دیگر تنظیموں کے خلاف جاری کارروائیوں میں تربیت نہیں دے رہی ہیں”۔جنرل اولسن نے مزید کہا کہ ناٹو اتحاد کے مشن میں توسیع کا آغاز ابھی تک نہیں ہوا۔ اس کے لیے عراقی حکومت کی جانب سے درخواست اور اتحاد میں شامل تیس ممالک کی منظوری کی ضرورت ہے۔ ناٹو کے کمانڈر نے واضح کیا کہ ہم عراق کی خود مختاری کا احترام کرتے ہیں اور سرکاری دائرہ کار میں کام کر رہے ہیں۔
